Прызнаным майстрам савецкай эстраднай песні другой паловы XX ст. быў выдатны беларускі спявак Віктар Лук’янавіч Вуячыч.

Нарадзіўся В. Вуячыч у Харкаве. Юнацтва, якое прыпала на вайну, правёў на Алтаі, у г. Рубцоўску. Служыў на Балтыцы. Кропкай адліку сваёй прафесійнай дзейнасці лічыў 1953 г., калі пачаў пець у ансамблі Чырвонасцяжнага Балтыйскага флоту. У 1957 г. В. Вуячыч пераехаў у Мінск. Скончыў Мінскае музычнае вучылішча імя М.Г. Глінкі. Выступаў у Ансамблі песні і танца Беларускай ваеннай акругі. Быў салістам Дзяржаўнага народнага хору Беларусі і хору Беларускага радыё, салістам Беларускай дзяржаўнай філармоніі.

Сапраўдны поспех і прызнанне прыйшлі да спевака ў 1966 г. пасля ўдзелу ва Усесаюзным конкурсе на лепшае выкананне савецкай песні, галоўную прэмію ў якім яму прынесла песня І. Лучанка “Памяць сэрца”. Песня адкрыла свету спевака В. Вуячыча і жыла ў яго рэпертуары больш за трыццаць год.

У 1967 г. В. Вуячыч стаў лаўрэатам Міжнароднага конкурсу эстраднай песні “Залаты арфей” (Балгарыя), а ў 1970-я гады ўжо быў вядомы ва ўсім СССР. У 1973 г. ён быў узнагароджаны Вялікім спецыяльным прызам Міжнароднага фестывалю сучаснай эстраднай песні ў Токіа. У 1976 г. атрымаў званне народнага артыста БССР. В. Вуячыч – адзін з ініцыятараў нараджэння Міжнароднага музычнага фестывалю ў Магілёве “Залаты шлягер”. З 2002 г. заснаваны спецыяльны прыз гэтага фестывалю для маладых выканаўцаў імя В. Вуячыча. Разам з вакальна-інструментальным ансамблем “Тоніка” ён аб’ездзіў увесь свет: выступаў у Еўропе і Лацінскай Амерыцы, Японіі, Індыі, Бірме. Рэпертуар спевака быў надзвычай вялікім і ўключаў творы самых разнастайных жанраў – ад оперных арый і старадаўніх рамансаў да шлягераў, якія набывалі ў яго выкананні своеасаблівы шарм. Але вядучае месца ў творчасці В. Вуячыча займалі песні савецкіх, у тым ліку і беларускіх кампазітараў. Ён быў першым выканаўцам многіх песень І. Лучанка. На працягу доўгіх гадоў ішоў у творчасці поплеч з В. Івановым, Э. Зарыцкім, Э. Ханком. Для яго пісалі М. Сацура і А. Елісеенкаў.

Цудоўны артыст, чый прыгожы барытон не адно дзесяцігоддзе зачароўваў, падпарадкоўваў сабе шматмільённыя аўдыторыі слухачоў, назаўсёды застаўся ў гісторыі беларускай эстрады.

Матэрыял падрыхтаваны ў 2009 г.