Богдан Мікалай Уладзіміравіч

Дата нараджэння: 14.01.1943

Дата смерці: 15.08.2001

Кароткая даведка: вучоны ў галіне машынабудавання, адзін з заснавальнікаў беларускай навуковай школы гідрапнеўмааўтаматыкі, лаўрэат Дзяржаўнай прэміі Беларусі (1996)

Імёны на іншых мовах: Богдан Николай Владимирович (руская);

Мікалай Уладзіміравіч Богдан – ураджэнец Конашскага раёна Архангельскай вобласці (Расія). У 1970 г. скончыў Беларускі політэхнічны інстытут – БПІ (цяпер Беларускі нацыянальны тэхнічны ўніверсітэт – БНТУ) і атрымаў размеркаванне на Мінскі трактарны завод (МТЗ). У 1970–1972 гг. малады інжынер-канструктар працаваў у асобым канструктарскім бюро МТЗ. У 1972 г. Мікалай Богдан быў залічаны ў аспірантуру БПІ–БНТУ. З 1975 г. працаваў малодшым навуковым супрацоўнікам навукова-даследчай лабараторыі колавых трактароў; быў асістэнтам, старшым выкладчыкам, дацэнтам і прафесарам кафедры “Трактары” (1976–1994). У 1976 г. абараніў кандыдацкую дысертацыю і атрымаў вучоную ступень кандыдата тэхнічных навук, у 1986 г. стаў доктарам. Асноўнымі накірункамі навуковых даследаванняў вучонага стала тэорыя канструявання і разлік пнеўматычных і электрапнеўматычных сістэм для мабільных машын з электроннымі сродкамі кіравання імі. У 1994–2001 гг. Мікалай Уладзіміравіч займаў пасаду загадчыка кафедры “Гідрапнеўмааўтаматыка і гідрапнеўмапрывад” аўтатрактарнага факультэта Беларускай дзяржаўнай політэхнічнай акадэміі (цяпер БНТУ).

За гады навуковай працы вучоны апублікаваў больш за 400 навуковых прац, у тым ліку 6 манаграфій, 120 артыкулаў і тэзісаў дакладаў, падрыхтаваў 4 навучальных дапаможніка, атрымаў каля 300 аўтарскіх пасведчанняў і патэнтаў на вынаходствы. Пад кіраўніцтвам М.У. Богдана было падрыхтавана 16 кандыдатаў і адзін доктар тэхнічных навук. Вынікі яго практычнай дзейнасці адзначаны залатым і срэбным медалямі ВДНГ СССР. У 1996 г. за цыкл падручнікаў і вучэбных дапаможнікаў для студэнтаў вышэйшых навучальных устаноў Мікалай Уладзіміравіч Богдан у складзе творчага калектыву стаў лаўрэатам Дзяржаўнай прэміі Рэспублікі Беларусь. У вучэбным комплексе “Трактары” была ўпершыню ажыццёўлена ідэя міжпрадметных сувязей агульнатэхнічных і прафілюючых дысцыплін, закладзены прынцыпы бесперапыннай фізіка-матэматычнай падрыхтоўкі студэнтаў, створана трывалая аснова для вывучэння фундаментальных і агульнатэхнічных дысцыплін.

Матэрыял падрыхтаваны ў 2013 г.