Нястомны збіральнік, захавальнік і папулярызатар спадчыны беларускага песняра Якуба Коласа, яго старэйшы сын Даніла Канстанцінавіч Міцкевіч, нарадзіўся 30 верасня 1914 г. у Пінску, дзе ў той час жылі і працавалі яго бацькі. Дзіцячыя гады прыйшліся на цяжкія часы Першай сусветнай вайны і прайшлі ў эвакуацыі: Пярмі і на Куршчыне (Расія). Гэтыя ж мясціны для маленькага хлопчыка сталі крыніцай першых жыццёвых уражанняў і ўспамінаў. Нягледзячы на ваеннае ліхалецце, галоднае існаванне і агульную неўладкаванасць Даніла рос дапытлівым і разумным хлопчыкам, які рана навучыўся чытаць і пісаць. З 1921 г. сям’я жыла ў Мінску. Даніла вучыўся ў школе-сямігодцы, на курсах англійскай і нямецкай моў. Потым была хімпрафшкола, дзе юнак пазнаёміўся і на ўсё жыццё пасябраваў з хімічнай навукай. У 1936 г. Даніла скончыў хімічны факультэт Беларускага дзяржаўнага ўніверсітэта, потым вучыўся ў аспірантуры і працаваў выкладчыкам.

У гады Вялікай Айчыннай вайны Д. К. Міцкевіч працаваў як вучоны-хімік у Сярэднеазіяцкім універсітэце і хімічнай групе Нацыянальнай акадэміі навук Беларусі ў Ташкенце (Узбекістан), дзе займаўся распрацоўкай хімічных сумесяў для ваеннай прамысловасці. У жніўні–лістападзе 1943 г. кіраваў хімічным факультэтам адноўленага БДУ пад Масквой. З 1944 г. працаваў у Інстытуце хіміі НАН Беларусі на пасадах старшага навуковага супрацоўніка, вучонага сакратара, загадчыка лабараторыі. Быў проста апантаны сваёй працай і стаў сапраўдным прафесіяналам у галіне хіміі.

Пасля смерці свайго бацькі Даніла Канстанцінавіч быў прызначаны дырэктарам створанага ў 1957 г. пры Акадэміі навук Літаратурнага музея імя Якуба Коласа. На працягу многіх гадоў ён кіраваў музеем, а потым быў яго старшым навуковым супрацоўнікам. Менавіта пад кіраўніцтвам Данілы Канстанцінавіча музей стаў важным асяродкам коласазнаўства. Д. К. Міцкевіч выступаў у друку, на радыё і тэлебачанні, у школах з паведамленнямі і размовамі пра свайго знакамітага бацьку і яго спадчыну. Ён таксама з’яўляецца аўтарам успамінаў, прысвечаных Я. Коласу, артыкулаў па коласазнаўстве і праблемах культуры.

Матэрыял падрыхтаваны ў 2011 г.