Гарбачоў Мікалай Сцяпанавіч

Дата нараджэння: 15.05.1948 Рагачоў, г., Гомельская вобласць

Дата смерці: 09.04.2019

Кароткая даведка: спартсмен і трэнер (веславанне на байдарках і каноэ), заслужаны майстар спорту СССР, заслужаны трэнер Беларусі, чэмпіён ХХ летніх Алімпійскіх гульняў (1972, Мюнхен), чэмпіён (1974) і бронзавы прызёр (1971, 1975) чэмпіянатаў свету, бронзавы прызёр (1971, 1975) чэмпіянатаў Еўропы, мнагакратны чэмпіён СССР, ганаровы грамадзянін Рагачова, кавалер ордэна "Знак Пашаны"

Імёны на іншых мовах: Gorbachev Nikolai (не вызначана); Горбачев Николай Степанович (руская); Горбачёв Николай Степанович (руская);

Мікалай Гарбачоў нарадзіўся 15 мая 1948 г. у г. Рагачоў Гомельскай вобласці. Першымі спартыўнымі захапленнямі будучага алімпійскага чэмпіёна сталі баскетбол і лыжныя гонкі. У 1960 г. Мікалай прыйшоў у секцыю веславання, дзе шэфства над ім узяў трэнер Віктар Станібула. Першыя поспехі не прымусілі сябе чакаць. Ужо ў 1965 г. на Усесаюзнай спартакіядзе школьнікаў, выступаючы за зборную БССР, Мікалай Гарбачоў разам з Леанідам Рэуцёнкам сталі сярэбранымі прызёрамі ў байдарцы-двойцы на дыстанцыі 1000 м. У 1966 г. Мікалай Гарбачоў першым з спартсменаў Рагачова атрымаў званне майстра спорту Савецкага Саюза.

У перадалімпійскім сезоне беларускі квартэт байдарачнікаў (М. Гарбачоў, М. Хахол, Л. Дзеравянка, У. Савва) стаў пераможцам Спартакіяды народаў СССР на дыстанцыі 1000 м. У Белградзе на дыстанцыі 10000 м Мікалай у складзе зборнага экіпажа (Х. Курвет, В. Климов, У. Землякоў, М. Гарбачоў) стаў бронзавым прызёрам чэмпіяната свету. Напярэдадні Алімпіяды–1972 трэнеры савецкай зборнай сфарміравалі экіпаж байдаркі-двойкі, у які ўвайшлі Мікалай Гарбачоў і Віктар Картасюк з Грузіі. Пасля некалькіх пробных заездаў спартсмены дэманстравалі выдатную зладжанасць працы і поўнае паразуменне. Нягледзячы на тое, што фаварытамі ў гонцы на байдарках-двойках на дыстанцыі 1000 метраў лічыліся весляры з Венгрыі, ГДР і Аўстрыі, савецкія весляры Гарбачоў і Картасюк змаглі ўпэўнена заваяваць перамогу з перавагай ў 0,7 секунды над супернікамі з Венгрыі. Пасля перамогі на Алімпійскіх гульнях Мікалай Гарбачоў працягваў выступаць на буйных сусветных і еўрапейскіх спаборніцтвах у экіпажы байдаркі-двойкі і ў байдаркі-чацвёркі.

Пасля заканчэння спартыўнай кар’еры ў 1976 г. спартсмен вярнуўся ў Рагачоў, дзе пачаў трэнерскую кар’еру. Разам з М. Гаўрыленка дамогся адкрыцця СДзЮШАР №2 па веславанні на байдарках і каноэ. Ён жа стаў першым дырэктарам гэтай установы і ўзначальваў яе да 2010 г. Таксама Мікалай Гарбачоў рэгулярна ўдзельнічаў у гонках ветэранаў.

Даведка падрыхтавана на аснове матэрыялаў сайта Нацыянальнага алімпійскага камітэта Рэспублікі Беларусь у 2019 г.