Вучоны ў галіне эканомікі Васіль Сяргеевіч Нямчынаў нарадзіўся ў в. Грабава Пензенскай вобласці (Расія). Скончыўшы Чэлябінскае рэальнае вучылішча ў 1913 г., паступіў на эканамічнае аддзяленне Маскоўскага камерцыйнага інстытута. Да 1926 г. працаваў у статыстычных установах Масквы, Чэлябінска, Свярдлоўска. З 1926 па 1930 г. быў членам калегіі ЦСУ СССР. У 1928–1948 гг. В.С. Нямчынаў загадваў кафедрай статыстыкі Маскоўскай сельскагаспадарчай акадэміі імя К.А. Ціміразева, з 1940 па 1948 г. быў дырэктарам акадэміі. У гэты перыяд ён стаў доктарам эканамічных навук (1935), прафесарам (1930), акадэмікам НАН Беларусі (1940), акадэмікам АН СССР (1946), акадэмікам УАСГНІЛ (1948). У 1949–1963 гг. В.С. Нямчынаў кіраваў Саветам па вывучэнні прадукцыйных сіл АН СССР, распрацоўцы тэорыі іх развіцця і размяшчэння; па комплексным вывучэнні прыродных рэсурсаў і прадукцыйных сіл усходніх раёнаў. Адначасова з 1947 па 1957 г. быў прафесарам кафедры палітэканоміі Акадэміі грамадскіх навук пры ЦК КПСС. У 1954–1958 гг. ён акадэмік-сакратар Аддзялення эканамічных, філасофскіх і прававых навук АН СССР. У 1958 г. арганізаваў першую ў краіне лабараторыю эканоміка-матэматычных метадаў АН СССР, на базе якой ў 1963 г. быў створаны Цэнтральны эканоміка-матэматычны інстытут АН СССР. З 1962 г. загадваў кафедрай матэматычных метадаў аналізу эканомікі Маскоўскага дзяржаўнага ўніверсітэта. З 1954 г. быў адказным рэдактарам часопіса «Ученые записки по статистике», які выдаваўся Аддзяленнем эканамічных навук АН СССР, з 1964 г. – галоўным рэдактарам часопіса «Экономика и математические методы». У 1958 г. выбраны сапраўдным членам Міжнароднага статыстычнага інстытута, у 1961 г. стаў членам Каралеўскага статыстычнага таварыства Вялікабрытаніі, у 1964 г. – ганаровым доктарам Бірмінгемскага ўніверсітэта (Вялікабрытанія, 1964).

Васіль Сяргеевіч з'яўляецца адным з заснавальнікаў эканоміка-матэматычнага напрамку савецкай эканамічнай навукі. Яго працы прысвечаны пытанням тэорыі і практыкі статыстыкі, праблемам развіцця прадукцыйных сіл і структуры грамадскай вытворчасці, метадалогіі вывучэння прадукцыйнасці працы і распрацоўцы мадэлей планавай эканомікі. У 1946 г. за навуковую працу «Сельскохозяйственная статистика с основами общей теории» (1945) В.С. Нямчынаву была прысуджана Дзяржаўная прэмія СССР. У 1963 г. выйшла яго кніга «Экономико-математические методы и модели», якая стала значным укладам у развіццё эканамічнай навукі. За ўдзел у распрацоўцы метада лінейнага праграмавання і эканамічных мадэлей была прысуджана Ленінская прэмія (1965). Вучоны з'яўляецца аўтарам каля 330 навуковых прац, у тым ліку 9 манаграфій, сярод якіх – «О перспективах развития экономики Восточной Сибири» (1959), «Экономико-математические методы и модели» (2-е перапрац. і дап. выд., 1965), «О дальнейшем совершенствовании планирования и управления народным хозяйством» ( 2-е выд., 1965), «Экономика и математика» (1965) і інш. У 1967–1969 гг. былі выдадзены «Избранные произведения» (у 6 т.).

Ён узнагароджаны ордэнамі Леніна (1939, 1946, 1964), Працоўнага Чырвонага Сцяга (1940, 1944 г.), Чырвонай Зоркі (1945), медалямі. У 1993 г. Расійская акадэмія навук заснавала прэмію імя В.С. Нямчынава за выдатныя работы ў галіне эканоміка-матэматычных мадэлей і метадаў.

Матэрыял падрыхтаваны ў 2019 г.