Кідальнік молата, заслужаны майстар спорту СССР і Беларусі Ігар Вячаслававіч Астапковіч нарадзіўся ў г. Наваполацк Полацкага раёна Віцебскай вобласці. Сваю лёгкаатлетычную кар’еру ён пачаў яшчэ ў 1974 г. і амаль адразу сканцэнтраваўся выключна на кіданні молата. Падрыхтоўку праходзіў пад кіраўніцтвам трэнераў П.У. Зайцава, Ю.М. Бакарынава, Ю.М. Тарасюка, К.В. Астапковіча. У 14 год малады спартсмен стаў пераможцам Спартакіяды школьнікаў Беларусі. У далейшым быў шэраг паспяховых выступленняў у юнацкіх спаборніцтвах, Сусветных універсіядах, Гульнях Добрай волі, Чэмпіянатах СССР і Еўропы.

І.В. Астапковіч працягваў трэніроўкі, што дало магчымасць дасягнуць найлепшых вынікаў: у 1992 г. спартсмен заваяваў серабро ХХV летніх Алімпійскіх гульняў у Барселоне (Іспанія), а ў 2000 г. – бронзу ХХVІІ летніх Алімпійскіх гульняў у Сіднэі (Аўстралія). Пасля завяршэння спартыўнай кар’еры займаў пасаду трэнера нацыянальнай зборнай па лёгкай атлетыцы, перадаваў свой багаты вопыт і шматгадовыя напрацоўкі новаму пакаленню маладых спартсменаў.

Матэрыял падрыхтаваны ў 2017 г.