Кандрат Ільіч Карсалін нарадзіўся ў небагатай мяшчанскай сям’і. З дзяцінства праяўляў схільнасць да малявання і ў дванаццацігадовым узросце самастойна асвоіў майстэрства напісання абразоў. Неўзабаве яго сталі запрашаць у якасці памочніка мясцовыя прафесійныя іканапісцы. У Слуцку паспрабаваў свае сілы і ў жывапісе. Першыя ўрокі па партрэтнаму мастацтву атрымаў ад настаўніка малявання Слуцкай мужчынскай гімназіі Т. Гесэ, аднак шмат чаго таленавітаму юнаку прыйшлося спасцігаць самастойна.

З сярэдзіны 1830-х гг. К. І. Карсалін знаходзіўся у Арле, дзе зарабляў на жыццё напісаннем партрэтаў і абразоў. Там упершыню прыняў удзел у мастацкай выстаўцы, на якой яго творы заўважыў прафесар Санкт-Пецярбургскай імператарскай акадэміі мастацтваў В. І. Грыгаровіч. Менавіта ён параіў маладому мастаку неадкладна ехаць у Санкт-Пецярбург для ўдасканалення майстэрства і даў рэкамендацыі да паступлення ў акадэмію.

На працягу 1836–1839 гг. К. І. Карсалін з’яўляўся вольным слухачом Санкт-Пецярбургскай імператарскай акадэміі мастацтваў. Скончыўшы навучанне, атрымаў званне пазакласнага мастака і быў накіраваны ў складзе 12-й Рускай духоўнай місіі у Пекін. На працягу трох гадоў ён рабіў замалёўкі краявідаў і тыпаў мясцовых жыхароў, пісаў партрэты знатных кітайцаў, займаўся вывучэннем сакрэтаў прыгатавання фарбаў і тушы, авалодваў тэхнікай кітайскага жывапісу. Пасля перанесенай хваробы пакінуў місію і вярнуўся ў Расію. Жыў у Іркуцку, дзе выканаў серыю акварэльных партрэтаў членаў рэвізійнай камісіі па раследаванні дзейнасці генерал-губернатара Усходняй Сібіры В. Я. Руперта. Пасля 1846 г. у Санкт-Пецярбургу працягваў займацца жывапісам, даваў урокі малявання. У гэты перыяд напісаў шмат абразоў для розных храмаў у Санкт-Пецярбургу, Варшаве, Дынабургу, Ларканах (Малдова). У 1854 г. за выкананне партрэта обер-свяшчэнніка арміі і флоту В. І. Кутневіча атрымаў званне акадэміка партрэтнага жывапісу і быў уключаны ў склад Савета Санкт-Пецярбургскай імператарскай акадэміі мастацтваў. Пасля звальнення са службы некаторы час заставаўся ў сталіцы. Як сведчаць архіўныя матэрыялы, у 1879–1883 гг. мастак жыў на радзіме.

У рускім мастацтве К. І. Карсалін застаўся вядомым пераважна як майстар камернага партрэта. Ён з’яўляецца таксама адным з пачынальнікау партрэтнага жанру ў Сібіры. Лёс значнай часткі творчай спадчыны мастака невядомы. Зараз яго творы знаходзяцца ў Іркуцкім мастацкім музеі і Рускім музеі ў Санкт-Пецярбургу. У Нацыянальным мастацкім музеі Рэспублікі Беларусь захоўваецца некалькі работ мастака. Сярод іх – «Партрэт невядомага», «Партрэт К. Я. Дарагана», «Партрэт Г. І. Дараган», «Партрэт маладога чалавека».

Матэрыял падрыхтаваны ў 2019 г.