У 1740-я гг. у Крычаўскім старостве адбылося буйнейшае ўзброенае паўстанне сялян супраць феадальнага прыгнёту. Кіраўніком сялянскага руху выступіў Васіль Мацвеевіч Вашчыла. Нарадзіўся ён у 1690 г. у в. Лобжа Крычаўскага павета Мсціслаўскага ваяводства (цяпер Клімавіцкі раён Магілёўскай вобласці). Быў войтам в. Селішчы. Неаднаразова насіў уладальніку староства, Гераніму Фларыяну Радзівілу, скаргі сялян на злоўжыванні і самавольства арандатараў, за што неаднаразова быў зняволены. Сваёй непрымірымасцю і актыўнай барацьбой супраць феадальнага ўціску заваяваў павагу і аўтарытэт жыхароў сваёй і суседніх вёсак. У мai 1740 г. Васіль Вашчыла ўзначаліу першы ўзброены сялянскі атрад, які пачаў баявыя дзеянні супраць арандатарскіх наймітаў. Да атрада пазней далучыліся сяляне з іншых шляхецкіх уладанняў і з-за мяжы. У сярэдзіне 1741 г. у сялянскіх хваляваннях, якія ахапілі большую частку Крычаўскага староства, удзельнічала некалькі тысяч чалавек.

Князь Г.Ф. Радзівіл пайшоў на ўступкі сялянам, прыслаў новага арандатара, аднак становішча гэта не змяніла. У канцы 1743 г. антыфеадальная барацьба прыняла характар узброенага паўстання. У баях пад Крычавам і каля в. Царковішча войскі Гераніма Радзівіла разбілі дрэнна ўзброеныя сялянскія атрады і жорстка расправіліся з паўстанцамі. Вашчылу ўдалося ўцячы на Латакоўскі расійскі фарпост, адкуль ён быў пераведзены на Цімошынскую пагранічную заставу. Радзівіл запатрабаваў выдаць Вашчылу як сялянскага важака, які павінен адказаць за ўсе "ліхадзействы". Каб не трапіць у рукі карнікаў, Вашчыла выдаў сябе за расійскага падданага. Пакуль ішло следства, ён сядзеў у Старадубскай крэпасці, дзе захварэў на дызентэрыю і неўзабаве памёр.

Матэрыял падрыхтаваны ў 2011 г.