Аляксей Рагуля нарадзіўся 25.03.1935 г. у вёсцы Сенна (раней – Сенная) Навагрудскага раёна, Гродзенскай вобласці ў сялянскай сям’і.

Пасля заканчэння Любчанскай сярэдняй школы Навагрудскага раёна (1951) на працягу года загадваў хатай-чытальняй у роднай вёсцы. У 1957 г. скончыў філалагічны факультэт Беларускага дзяржаўнага ўніверсітэта. У 1957–1962 гг. выкладаў рускую мову і літаратуру ў Халхоліцкай і Зачысцкай школах Барысаўскага раёна. У 1962–1970 гг. быў выкладчыкам беларускай мовы і літаратуры ў школе-інтэрнаце № 7 г. Мінска і Рэспубліканскай школе спартыўнага профілю (пазней – Рэспубліканская школа алімпійскага рэзерву).

З 1970 г. – асістэнт, старшы выкладчык, з 1976 г. – дацэнт кафедры беларускай літаратуры Мінскага педагагічнага інстытута імя М. Горкага. У 1991–2002 гг. – загадчык кафедры тэорыі і гісторыі культуры. Па сумяшчальніцтву – дэкан факультэта народнай культуры (1994–1996 гг.), з 2002 г. – прафесар гэтай жа кафедры.

Кандыдат філалагічных навук (1975), прафесар культуралогіі (1993). Выдатнік народнай асветы (1985), член-карэспандэнт Міжнароднай акадэміі навук па секцыі культуралогіі. Сябра СП СССР з 1990 г. Першы крытычны артыкул апублікаваў у 1968 г.

Аўтар раздзелаў і навуковы рэдактар (сумесна з В.Я. Ляшук) вучэбнага дапаможніка для педагагічных інстытутаў “Методыка выкладання беларускай літаратуры” (1986). Аўтар літаратурна-крытычных публікацый у перыядычным друку і навуковых прац, прысвечаных праблеме выкладання літаратуры ў школе, навуковых дакладаў па філасофіі культуры. Аўтар метадычнага дапаможніка “Беларуская літаратура ў 4 класе” (1989), кніг літаратурнай крытыкі “Імгненні” (1990), “Пафас станаўлення” (1991), падручніка-хрэстаматыі для 8 кл. “Родная літаратура” (выд. 1989 г. і 1991 г., у суаўтарстве з Л.Ф. Тамашовай), падручніка-хрэстаматыі для 8 кл. “Беларуская літаратура” (1994 г., 1996 г., у суаўтарстве з В.В. Кушнярэвіч), эксперыментальнага падручніка-хрэстаматыі “Беларуская літаратура. 9 клас” (2002, у суаўтарстве з В.В. Кушнярэвіч), вучэбнага дапаможніка для 9 класа “Беларуская літаратура” ў дзвюх частках (2006, у суаўтарстве з В.В. Кушнярэвіч і Г.С. Гарадко). Напісаў раздзелы “Кузьма Чорны”, “Іван Мележ”, “Васіль Быкаў” у падручніку “Гісторыя беларускай савецкай літаратуры” (1981–1983) для педагагічных інстытутаў. Прымаў удзел у выданні Збору твораў К. Чорнага ў 6 тамах (1988–1991) і напісаў літаратуразнаўчы каментарый да твораў празаіка. Аўтар тыпавых праграм для сярэдняй школы па літаратуры (у суаўтарстве), аўтар і навуковы рэдактар тыпавых праграм па дысцыплінах культуралагічнага цыклу для вышэйшай школы (2003). Арганізатар і ўдзельнік шэрага міжнародных і рэспубліканскіх канферэнцый па праблеме гісторыка-культурнага развіцця, праведзеных у 1992–2006 гг. у БДПУ імя М. Танка на базе кафедры тэорыі і гісторыі культуры. Аўтар навуковых дакладаў па тыпалогіі гісторыка-культурнага працэсу, літаратурна-крытычных артыкулаў.

Матэрыял падрыхтаваны ў 2010 г.