Платон Мікалаевіч Пагарэльскі нарадзіўся ў Віцебскай губерні ў шляхецкай сям’і. Вучыўся ў Віцебскай гімназіі. У 1822 г. скончыў аддзяленне фізічных і матэматычных навук Імператарскага Маскоўскага ўніверсітэта. Пасля атрымання дыплома быў настаўнікам арыфметыкі ў Маскоўскім універсітэцкім пансіёне. У 1827 г. абараніў магістарскую дысертацыю на тэму «О способах определять удельный вес тел». У 1829 г. працаваў старшым выкладчыкам фізікі і матэматыкі ў Маскоўскай губернскай гімназіі. У гэтым жа годзе накіраваны ў Санкт-Пецярбург для вывучэння прыёмаў хуткага вылічэння, вынікам чаго стала работа «Опыт изложения способов решать числовые задачи на счетах» (1830). З 1830 г. з’яўляўся выкладчыкам аналітычнай геаметрыі ў Маскоўскім універсітэце, Маскоўскім выхаваўчым доме і ў жаночым аддзяленні Сіроцкага інстытута, пансіёне Вейдэнгамера. Адначасова быў хатнім настаўнікам І.С. Тургенева, П.Л. Чабышова. З-за адсутнаці падручнікаў на рускай мове пераклаў з французскай мовы «Курс чистой математики», які складаўся з асобных кніг ‒ «Арифметика» (1832), «Алгебра» (1833), «Геометрия» (1834). Вучэбныя выданні неаднаразова перавыдаваліся і сталі каштоўнай крыніцай вывучэння элементарнай матэматыкі для шматлікіх пакаленняў навучэнцаў. У 1836 г. прызначаны інспектарам 1-й Маскоўскай гімназіі. Дзякуючы яму ва ўстанове палепшылася якасць навучання новым замежным мовам. З 1839 г. быў дырэктарам Маскоўскай рэальнай гімназіі. З 1841 г. кіраваў маскоўскімі вучылішчамі (гарадскімі і павятовымі) і пачатковымі школамі. Платон Мікалаевіч наладзіў адукацыйны працэс, развіў матэрыяльна-тэхнічную базу навучальных устаноў, сфарміраваў калектыў выкладчыкаў. Пры Маскоўскай гімназіі быў заснаваны педагагічны клас, дзе праходзілі прафесійную перападрыхтоўку на настаўніка пачатковых школ. У выніку ўзровень выкладання ў пачатковых школах Масквы і наваколля значна павысіўся, а самі вучэбныя ўстановы сталі лепшымі ў Расійскай імперыі першай паловы XIX ст.

Матэрыял падрыхтаваны ў 2025 г.