Імя мастака Канстанціна Фадзеевіча Кукевіча звязана з развіццём бытавога жанру не толькі ў беларускім, але і ў польскім і літоўскім жывапісе.

Нарадзіўся К.Ф. Кукевіч у 1810 г. у Вільні ў сям'і адваката. Прафесійную падрыхтоўку пачынаў у Віленскім універсітэце ў Яна Рустэма, які выкладаў там у 1798–1832 гг. Затым вучыўся ў Пецярбургскай акадэміі мастацтваў (1835–1839) па класу баталіста А. Заўэрвейда. Аднак баталістам ён не стаў.

На аснове жыцця і побыту беларускага і яўрэйскага насельніцтва Віленшчыны і Гродзеншчыны ў 1830-я гг. стварыў шэраг жанравых кампазіцый, якія з цягам часу сталі каштоўнымі гістарычнымі выяўленчымі крыніцамі: «Рускія салдаты ў вёсцы», «Прывал уланаў каля пераправы цераз раку», «Карчма», «Яўрэйскія кантрабандысты ў ваколіцах Вільні».

Шмат працаваў К. Кукевіч як графік. Сярод яго графічных замалёвак «Гандляр шапкамі», «Букініст», «Карчма ў прадмесці», «Старызнік». У 1840 г. ён выдаў серыю літаграфій «Вільня, год 1840» – сцэн з народнага жыцця. Малюнкі К.Ф. Кукевіча змешчаны ў альбоме Я. Вільчынскага.

Ранняя смерць К. Кукевіча ў 1842 г. на 32 годзе жыцця не дазволіла яму ўзняцца ў сваіх творах да значных сацыяльных абагульненняў, але і той уклад, які ён паспеў унесці ў жанравы жывапіс Беларусі, заслугоўвае павагі і вывучэння.

Матэрыял падрыхтаваны ў 2011 г.