Марыя Паўлаўна Маркоўская нарадзілася ў Рызе. З дзесяцігадовага ўзросту выступала ў цырку і на эстрадзе ў Растове-на-Доне, Кіеве, Мінску. У 1934 г. паступіла ў студыю пры Беларускім тэатры імя Я. Коласа (мастацкі кіраўнік Ц. М. Сяргейчык). Навучанне праходзіла ў асноўным шляхам практычных заняткаў: студыйцы выступалі ў масавых сцэнах і невялікіх эпізодах у спектаклях тэатра. Вясной 1938 г. маладым акцёрам, навучэнцам студыі, былі даручаны асобныя ролі і эпізоды ў спектаклях «Дзеці Ванюшына» С. Найдзёнава і «Мяшчане» М. Горкага. Пасля абмеркавання работ мастацкім саветам некалькі навучэнцаў студыі, у тым ліку і Марыя Маркоўская, былі залічаны ў штат тэатра.

Выступаючы на сцэне Беларускага тэатра імя Я. Коласа, актрыса выконвала ролі травесці, маладых гераінь, характарныя. Сярод лепшых яе работ: Каця («Дзеці Ванюшына» С. Найдзёнава), Валя («Ірынка» К. Чорнага), Аўдоля («Навальніца будзе» паводле Я. Коласа), Данілка («Раскіданае гняздо» Я. Купалы).

Найбольш блізкія індывідуальнасці М. П. Маркоўскай такія характарныя ролі, як Малання, Уліта («Мінулася кату масленіца», «Лес» А. Астроўскага), Кума («Улада цемры» Л. Талстога), Кватарантка («Мараль пані Дульскай» Г. Запольскай), Драга («Доктар філасофіі» Б. Нушыча), Рэгіна («Здані» Г. Ібсэна).

Вынаходліва, з камедыйным бляскам выкананы ёю ролі Марыяны («Забаўны выпадак» К. Гальдоні) і Анэлі («Дамы і гусары» А. Фрэдры). Іграла актрыса і ролі маладых гераінь: Марына («Людзі і д'яблы» К. Крапівы), Джэма («Авадзень» паводле Э. Л. Войніч).

Матэрыял падрыхтаваны ў 2011 г.