Кароткая даведка:
расійскі пісьменнік, гісторык, грамадскі дзеяч, творы якога ўпершыню адлюстравалі гераізм абаронцаў Брэсцкай крэпасці ў 1941 г., лаўрэат Ленінскай прэміі (1965)
Імёны на іншых мовах:
Смирнов Сергей Сергеевич (руская);
2229 сімвалаў
Даведка
Сяргей Сяргеевіч Смірноў нарадзіўся ў Петраградзе. Працаваў у Харкаве электраманцёрам на заводзе. У 1937 г. скончыў Маскоўскі энергетычны інстытут, у 1941 г. ‒ завочнае аддзяленне Літаратурнага інстытута імя М. Горкага. У час Вялікай Айчыннай вайны прайшоў навучанне ў зенітным артылерыйскім вучылішчы г. Уфа, удзельнічаў у баях, быў ваенным журналістам газеты «Мужество». З 1946 г. працаваў у Ваенным выдавецтве Міністэрства абароны, з 1950 г. ‒ у часопісе «Новый мир». У 1959‒1960 гг. з’яўляўся галоўным рэдактарам «Литературной газеты».
Асноўнай тэмай творчасці Сяргея Сяргеевіча стала вайна. Аўтар прадэманстраваў сябе як пісьменнік-дакументаліст. У 1954 г. былі выдадзены першыя аповесці «На палях Венгрыі» і «Сталінград на Дняпры». Наступныя кнігі ўзнавілі гераізм абаронцаў Брэсцкай крэпасці ў 1941 г.: «Крэпасць на граніцы» (1956), «У пошуках герояў Брэсцкай крэпасці» і «Брэсцкая крэпасць» (1957, дапоўнены ў 1964), «Героі Брэсцкай крэпасці» (1959), «Апавяданні пра невядомых герояў» (1963), «Таран над Брэстам» (1965), «Мы – з Брэста» (1972), «Героі Вялікай вайны» (1977). Сяргей Сяргеевіч напісаў п’есы «Крэпасць над Бугам» (пастаўлена Беларускім тэатрам імя Я. Коласа ў 1956 г.) і «Людзі, якіх я бачыў» (пастаўлена Брэсцкім і Магілёўскім абласнымі драматычнымі тэатрамі ў 1958 г.). Пісьменнік быў адным з ініцыятараў стварэння музея абароны Брэсцкай крэпасці-героя. Выступленні С. С. Смірнова ў друку, па радыё і тэлебачанні садзейнічалі разгортванню масавага руху па выяўленні малавядомых фактаў пра мужнасць савецкіх воінаў у гады Вялікай Айчыннай вайны. Ён з’яўляецца аўтарам дакументальных нарысаў, сцэнарыяў дакументальных і мастацкіх кінафільмаў. Вядомасць атрымалі кінасцэнарыі «Яго звалі Фёдар» (1963), «Кацюша» (1964), «Яны ішлі на ўсход» (1965), «Горад пад ліпамі» (1968). На беларускую мову творы С.С. Смірнова перакладалі А. Бажко, А. Бачыла.
Сяргей Сяргеевіч узнагароджаны ордэнамі Чырвонай Зоркі, медалямі «За ўзяцце Будапешта», «За перамогу над Германіяй у Вялікай Айчыннай вайне 1941‒1945 гг.». У 1964 г. удастоены Ленінскай прэміі. Імем С.С. Смірнова названа вуліца ў Брэсце. Яму прысвечаны стэнд у музеі Брэсцкай крэпасці-героя, у якім захоўваецца архіў пісьменніка.
