Скончыў Беларускі тэатральна-мастацкі інстытут (1987) і творчыя майстэрні Акадэміі мастацтваў СССР у Мінску. Вучыўся ў А. Анікейчыка, Г. Мурамцава, А. Арцімовіча. З 1986 года – пастаянны ўдзельнік мастацкіх выставак.

Працуе ў галіне манументальнай, станковай і мемарыяльнай скульптуры. Матэрыял – бронза. Сярод твораў: кампазіцыі «Беларуска» (1986), «Белавежская пушча» (1987), «Пушчы беларускія» (1988), «Апостал» (1989), «Кліч апошняга тура» (2001), «Дэметра» (2004), «Святы Хрыстафор» (2010), «Ягайла» (2011), «Вітаўт» (2011), «Спас Нерукатворны» (2012), «Студэнт эпохі Ф. Скарыны» (2013); мемарыяльныя дошкі С. Грахоўскаму (2003), П. Масленікаву (2004), А. Сысу (2009), медаль «Францыск Скарына» (1986) і інш.

Аўтар рэльефаў «Язэп Драздовіч» (1988), «Кастусь Каліноўскі» (1988), «Адам Міцкевіч» (1998), «Тадэвуш Касцюшка» (1999–2001), «Пане Каханку» (2000), «Дрэва прыгожага беларускага пісьменства» (2006), помнікі радзівілаўскаму харту (у суаўтарстве), вазы з тэматычнымі рэльефамі.

Творы скульптара знаходзяцца ў Нацыянальным мастацкім музеі, Нацыянальнай бібліятэцы Беларусі, Музеі сучаснага выяўленчага мастацтва, Літаратурных музеях Ф. Багушэвіча, Я. Купалы, К. Чорнага, фондах Беларускага саюза мастакоў, галерэях і прыватных калекцыях.

Матэрыял падрыхтаваны ў 2018 г.