Канопка Дамінік Вікенцьевіч

Дата нараджэння: 1886 Калавур, былы х., Лепельскі раён, Віцебская вобласць

Дата смерці: 1975

Кароткая даведка: удзельнік Першай сусветнай вайны, поўны Георгіеўскі кавалер

Імёны на іншых мовах: Конопка Доминик Викентьевич (руская); Конопко Доминик Викентьевич (руская);

Дамінік Вікенцьевіч Канопка нарадзіўся ў сялянскай сям’і. Атрымаў двухкласную адукацыю ў царкоўнапрыходскай школе. У пачатку 1900-х гг. быў прызваны ў армію, служыў у 6-ым Фінляндскім стралковым палку, што дыслацыраваўся ў г. Фрыдрыхзгам Выбаргскай губерні (цяпер г. Хаміна, Фінляндыя). Ён быў залічаны ў вучэбную каманду, потым заняў пасаду камандзіра ўзвода. Пасля заканчэння школы падпрапаршчыкаў застаўся на звыштэрміновую службу, якую адбываў у Выбаргу. У 1912 г. па сямейных абставінах быў дэмабілізаваны з арміі.

У пачатку Першай сусветнай вайны Д. В. Канопку зноў прызвалі ў армію. Ён быў залічаны ў склад 116-га Малаяраслаўскага стралковага палка і накіраваны на Паўночна-Усходні фронт ва Усходнюю Прусію. Падпрапаршчык Д. В. Канопка праявіў сабе восенню 1914 г. падчас Усходне-Прускай аперацыі расійскіх войск. Паранены, ён не кінуў камандаванне ўзводам, пакуль немцы не былі выбіты са сваіх пазіцый. Пасля лячэння зноў вярнуўся ў строй. За мужнасць, праяўленую ў баі, быў узнагароджаны Георгіеўскім крыжом 4-й ступені. У жніўні 1915 г. падпрапаршчык Д. В. Канопка на чале невялікага падраздзялення 10-й рускай арміі прабіваўся з акружэння праз лінію фронта ў раёне Гродна. За праведзеную аперацыю адважнаму камандзіру далі Георгіеўскі крыж 3-й ступені. Наступную ўзнагароду – Георгіеўскі крыж 2-й ступені – Д. В. Канопка атрымаў у лістападзе 1915 г. за правядзенне аперацыі па знішчэнні варожага каравула. У Нарачанскай наступальнай аперацыі на руска-германскім фронце вясной 1916 г. ён ўдзельнічаў у дзёрзкай вылазцы на варожую тэрыторыю, дзе па загадзе камандзіра зняў нямецкі сігнальны провад. За гэта быў узнагароджаны срэбраным медалём. У жніўні 1916 г. цяжка паранены падпрапаршчык Д. В. Канопка з вялікай рызыкай для жыцця ў час моцнага абстрэлу расійскіх пазіцый дакладна вызначыў месцазнаходжанне варожага мінамёта. За гэты смелы ўчынак яго ўзнагародзілі Георгіеўскім крыжом 1-й ступені. Пасля заканчэння лячэння па стану здароўя ён быў камісаваны.

Вярнуўшыся з вайны, Д. В. Канопка пасяліўся ў Лепелі, працаваў у лясгасе. Памёр Дамінік Вікенцьевіч у 1975 г. На доме, дзе ён жыў, усталявана мемарыяльная дошка.

Матэрыял падрыхтаваны ў 2016 г.