Вядомы вучоны-мовазнавец, педагог, метадыст Франя Міхайлаўна Літвінка нарадзілася ў Барысаве ў сям'і настаўнікаў. Педагагічныя схільнасці перадаліся ад бацькоў. У 1961 г. Ф. М. Літвінка паступіла на філалагічны факультэт Беларускага дзяржаўнага ўніверсітэта імя У. І. Леніна (БДУ). Закончыўшы вучобу па спецыяльнасці «Руская мова і літаратура» (1965) працавала загадчыцай кабінета кафедры рускай мовы Мінскага вышэйшага інжынернага радыётэхнічнага вучылішча, выхавацелем групы прадоўжанага дня сярэдняй школы № 73 г. Мінска, выкладчыкам рускай мовы і літаратуры Мінскага сувораўскага ваеннага вучылішча. З 1969 г. Ф. М. Літвінка – выкладчык кафедры рускай мовы філалагічнага факультэта БДУ. Кандыдацкую дысертацыю на тэму «Вторичная (потенциальная) предикативность результирующих трансформов предложений местоименно-соотносительного типа» абараніла ў 1985 г. З 1986 г. яна стала дацэнтам кафедры рускай мовы, а пазней дацэнтам кафедры методыкі выкладання рускай мовы і літаратуры. Доктарскую дысертацыю на тэму «Теория и практика обучения синтаксису осложненного предложения (5–8 классы средней школы)» Ф. М. Літвінка абараніла ў 1996 г. Сёння яна доктар педагагічных навук (1996), прафесар (1997) кафедры рыторыкі і методыкі выкладання мовы і літаратуры філалагічнага факультэта БДУ.

Мовазнавец займаецца праблемамі сінтаксісу сучаснай рускай мовы, методыкі выкладання рускай мовы ва ўстановах, якія забяспечваюць атрыманне агульнай сярэдняй, агульнай спецыяльнай і вышэйшай адукацыі, праблемамі прымянення сучасных тэхналогій навучання рускай мове. Франя Міхайлаўна – адна з распрацоўшчыкаў новай канцэпцыі моўнай адукацыі ў Рэспубліцы Беларусь, праграм па рускай мове. У арганізацыі навучання яна ў адпаведнасці са спецыфікай метадычных дысцыплін, якія выкладае, шырока выкарыстоўвае элементы разнастайных інавацыйных адукацыйных тэхналогій: апора на сучасныя інфармацыйныя тэхналогіі, тэхналогіі педагагічных майстэрняў, праблемна-модульнае выкладанне, праблемны і даследчыцкі метады пры чытанні лекцый і інш. Вучоны з'яўляецца аўтарам больш за 300 навуковых і вучэбна-метадычных работ («Методика изучения разделов школьного курса русского языка (функциональный подход)» (2001), «Изучение осложненного предложения: лингвистический и методический комментарий» (2002), «Русский язык: изучение осложненного предложения в 5–9-х классах)» (2006), «Методика преподавания русского языка в школе» (2015) і інш.).

Навукова-даследчыцкая, педагагічная, метадычная дзейнасць Ф. М. Літвінкі адзначана значком «Выдатнік народнай адукацыі» (1991), ганаровымі граматамі.

Матэрыял падрыхтаваны ў 2016 г.