Беларуская спявачка Валянціна Васілеўна Антонава нарадзілася ў Мінску.

З 1952 г. працавала ў Беларускай дзяржаўнай філармоніі і з'яўлялася салісткай (падгалосачнае сапрана) Дзяржаўнага народнага хору Беларусі (цяпер Нацыянальны акадэмічны народны хор Рэспублікі Беларусь імя Г.І. Цітовіча), адначасова ўваходзіла ў створаныя пры хоры жаночыя вакальныя ансамблі – актэт і квартэт “Купалінка”. У складзе актэта Валянціна Антонава ўдзельнічала ў VI (Масква, 1957) і IX (Сафія, 1968) Сусветных фестывалях моладзі і студэнтаў, мае залатыя медалі і дыпломы. У 1966 г. атрымала званне заслужанай артысткі Беларусі.

У 1975 г. з іншымі ўдзельніцамі квартэта В.В. Антонава перайшла ў фальклорна-харэаграфічны ансамбль “Харошкі”, дзе працавала да 1980 г. У складзе Дзяржаўнага народнага хору Беларусі, ансамбля “Харошкі” і квартэта “Купалінка” Валянціне Васілеўне пашчасціла выступаць на сцэнах Польшчы, Румыніі, Вялікабрытаніі, Канады, Фінляндыі, Францыі, Швейцарыі.

З 1986 па 1996 г. В.В. Антонава працавала ў Дзяржаўным акадэмічным рускім драматычным тэатры Беларусі (цяпер Нацыянальны акадэмічны драматычны тэатр імя М. Горкага).

Матэрыял падрыхтаваны ў 2012 г.