Нарадзіўся Міхась Кацюшэнка ў Мінску ў сям’і служачых. У 1971 г. скончыў вячэрняе аддзяленне факультэта журналістыкі Беларускага дзяржаўнага ўніверсітэта. З 1966 па 1975 г. працаваў у рэдакцыі газеты «Чырвоная змена» літсупрацоўнікам, намеснікам адказнага сакратара, загадчыкам аддзела. З 1975 г. быў інструктарам аддзела спартыўнай і абаронна-масавай работы, з 1977 г. – намеснікам загадчыка аддзела прапаганды і агітацыі ЦК ЛКСМБ. У 1979–1984 гг. – рэдактар газеты «Знамя юности». У 1984 г. скончыў завочнае аддзяленне Мінскай вышэйшай партыйнай школы. З 1984 па 1987 г. вучыўся ў аспірантуры Акадэміі грамадскіх навук пры ЦК КПСС. У 1987 г. яму прысвоена ступень кандыдата філалагічных навук. У гэтым жа годзе быў прызначаны намеснікам галоўнага рэдактара часопіса «Крыніца». У 1992–1994 гг. працаваў галоўным рэдарктарам газеты «Знамя юности». У 1981 г. стаў членам Саюза пісьменнікаў Беларусі.

Друкаваўся М. Кацюшэнка з 1966 г. Першыя мастацкія творы, навелы «Чаравік» і «Кніга», былі апублікаваны ў газеце «Чырвоная змена». Пісьменнік піша пра праблемы сучаснага горада, маладых рабочых. Многія яго аповесці і апавяданні прысвечаны дзецям, юнацтву. Аўтар раскрывае маральна-этычныя канфлікты ў сям’і, маладзёжным асяроддзі, аналізуе складаныя жыццёвыя сітуацыі, крытыкуе кар’ерызм і сацыяльную няроўнасць. Героі ў твораў М. Кацюшэнкі – простыя рабочыя, падлеткі, моладзь, камсамольскія работнікі. Літаратурная спадчына пісьменніка прадстаўлена зборнікамі аповесцей і апавяданняў «Первая осень» (1972), «Третий раунд» (1977), «Адзін дождж на ўсіх» (1979), «Дні, як усе іншыя» (1981), «Сустрэча пасля развітання» (1984), раманамі «Урок маўчання» (1988), «Прызнанне левага крайняга» (1990), «Сітуацыя» (1991). Ён з’яўляецца суаўтарам сцэнарыя дакументальнага фільма пра П. Клімука «Хроніка знаходжання на зямлі» (1981).

Матэрыял падрыхтаваны ў 2022 г.