Адзін з пачынальнікаў сучаснай дзіцячай хірургіі Беларусі Аляксандр Яўхімавіч Мангейм нарадзіўся ў Мінску ў сям’і служачага. Пасля заканчэння Мінскай класічнай гімназіі паступіў на медыцынскі факультэт Парыжскага ўніверсітэта (Сарбоны). Скончыўшы навучанне ў 1914 г., здаў дзяржаўны экзамен на званне лекара ў Юр’еўскім універсітэце (зараз Тартускі ўніверсітэт, Эстонія). Працаваў ваенна-палявым хірургам дзеючай арміі Расійскай Імперыі на германскім фронце. Стажыроўка пад кіраўніцтвам выдатных спецыялістаў таго часу М.Н. Бурдэнкі, М.М. Пятрова, В.Г. Цэге фон Мантэйфеля дазволіла яму набыць вялікі практычны вопыт і веды.

У час Кастрычніцкай рэвалюцыі і грамадзянскай вайны А.Я. Мангейм служыў у Чырвонай Арміі на пасадзе ўрача дывізійнага лазарэта Чапаеўскай дывізіі. З 1919 г. загадваў хірургічным аддзяленнем Чэрвеньскай (Ігуменскай) раённай бальніцы (Мінская вобласць). У наступныя гады Аляксандр Яўхімавіч працаваў у Беларускім дзяржаўным універсітэце на медыцынскім факультэце, які ў далейшым вылучыўся ў самастойную навучальную ўстанову – Мінскі медыцынскі інстытут. З 1934 г. вучоны ўзначальваў кафедру агульнай хірургіі гэтай установы. У гэтым жа годзе абараніў доктарскую дысертацыю на тэму “Материалы к изучению этиологии и патогенеза обезображивающего артрита”. Сярод іншых прац вучонага: падручнік “Дзіцячая хірургія” (1933), манаграфія “Патогенез, клиника и лечение послеродового лактационного мастита” (1936) і інш.

Вялікае месца ў лячэбнай, навуковай і педагагічнай дзейнасці прафесара Мангейма займалі пытанні дзіцячай хірургіі. На аснове абагульнення клінічнага матэрыялу вучоны абгрунтаваў неабходнасць адкрыцця спецыялізаваных дзіцячых хірургічных аддзяленняў пры бальніцах і стварэння педыятрычнага факультэта ў Мінскім медыцынскім інстытуце.

З пачаткам Вялікай Айчыннай вайны А.Я. Мангейм выехаў у Сярэднюю Азію, дзе працаваў загадчыкам кафедры шпітальнай хірургіі Сталінабадскага медыцынскага інстытута (зараз Таджыкскі дзяржаўны медыцынскі ўніверсітэт імя Абуалі ібні Сіна (Авіцэны), Таджыкістан). Праводзіў таксама вялікую кансультацыйную працу ў эвакашпіталях. У 1945 г. быў абраны загадчыкам кафедры шпітальнай хірургіі Чарнавіцкага дзяржаўнага медыцынскага інстытута (зараз Букавінскі дзяржаўны медыцынскі ўніверсітэт, Украіна) і кіраваў гэтай кафедрай на працягу 10 гадоў. Вучоны стаў адным з першых арганізатараў абласнога хірургічнага таварыства на Букавіне, неаднаразова выбіраўся яго старшынёй.

За гады сваёй педагагічнай дзейнасці прафесар падрыхтаваў вялікую колькасць урачоў, хірургаў і навуковых работнікаў. Пад яго кіраўніцтвам былі выкананы 3 доктарскія і 16 кандыдацкіх дысертацый. Ён з’яўляўся аўтарам больш за 50 навуковых прац па розных пытаннях хірургіі. Плённая шматгадовая навуковая дзейнасць А.Я. Мангейма была адзначана ордэнам Працоўнага Чырвонага Сцяга і двума медалямі, ганаровым званнем заслужанага дзеяча навукі Таджыкскай ССР.

Матэрыял падрыхтаваны ў 2017 г.