Анатоль Сяргеевіч Каменскі нарадзіўся ў Растове-на-Доне. Скончыў Растоўскае тэатральнае вучылішча і з 1937 г. працаваў у тэатрах горада. У 1958 г. Анатоль Каменскі паступіў на працу ў Гомельскі абласны драматычны тэатр. У спектаклях ён паспяхова выконваў як характарныя, так і камедыйныя ролі. Акцёрскае майстэрства А. Каменскага вызначалася выразнасцю, рэалістычнасцю, імправізацыйнасцю. Ён стварыў на сцэне такія яркія і разнапланавыя вобразы як дзед Цярэшка (“Рудабельская рэспубліка” С. Грахоўскага), Аўталік (“Зімовая казка” У. Шэкспіра), Пярчыхін (“Мяшчане” М. Горкага), Земляніка (“Рэвізор” М. Гогаля), Ібрагім-аглы (“Угрум-рака” В. Шышкова), Чыжоў (“Раскінулася мора шырока” У. Азарава), Скварцоў (“Ленінградскі праспект” І. Штока), Хамутоў (“Дзень добры, Крымаў” Г. Назарава) і многія іншыя. У 1963 г. А. Каменскі атрымаў званне заслужанага артыста Беларускай ССР.

Матэрыял падрыхтаваны ў 2022 г.