Марыя Іосіфаўна Карпенка нарадзілася ў вёсцы Дзярэчына, дзіцячыя і юнацкія гады правяла ў мястэчку Цімкавічы. Выдатна скончыла Цімкавіцкую сярэднюю школу (1951), факультэт журналістыкі Беларускага дзяржаўнага ўніверсітэта (1956). У 1956–1972 гг. працавала літаратурным супрацоўнікам, спецыяльным карэспандэнтам, загадчыкам аддзела і першым намеснікам рэдактара абласной газеты “Магілёўская праўда”. З 1972 г. займала пасаду галоўнага рэдактара рэспубліканскага часопіса “Работніца і сялянка” (з 1995 г. часопіс мае назву “Алеся”), якім кіравала на працягу дваццаці васьмі гадоў. Марыя Іосіфаўна заўсёды лічыла сваёй галоўнай задачай падрыхтоўку цікавых матэрыялаў, у тым ліку і крытычных. Дзякуючы яе намаганням часопіс для жанчын быў шырока вядомы не толькі на Беларусі, але і на ўсёй прасторы СССР, карыстаўся неверагоднай папулярнасцю: тыраж складаў паўтара мільёна экзэмпляраў! У 1999–2003 гг. М.І. Карпенка займала пасаду галоўнага рэдактара інфармацыйна-аналітычнай газеты навукоўцаў Беларусі “Веды”.

Марыя Іосіфаўна прымала актыўны ўдзел у грамадскім жыцці краіны: уваходзіла ў склад прэзідыума Камітэта савецкіх жанчын (1972–1980) і прэзідыума Беларускага саюза жанчын, выбіралася народным дэпутатам Вярхоўнага Савета СССР (1989), прымала ўдзел у рабоце беларускай дэлегацыі на XXVIII і XXXV сесіях Генеральнай Асамблеі ААН (1973, 1980), выконвала абавязкі сакратара Беларускага саюза журналістаў (1972–1991), на працягу шэрагу гадоў з’яўлялася першым намеснікам старшыні Беларускага камітэта міру, вяла актыўную работу ў таварыстве беларуска-французскай дружбы “Беларусь – Францыя”.

З журналісцкім блакнотам у руках М.І. Карпенка аб’ездзіла ўсю Беларусь, наведала дваццаць краін свету. Вынікам гэтых падарожжаў сталі шматлікія публікацыі ў рэспубліканскім друку, пяць кніг мастацкай публіцыстыкі: “Бярозка на Манхэтане” (1975), “Кожнаму хочацца шчасця” (1977), “Горький ветер с Гудзона” (1983), “Камісарскі сад” (1983), “Женщины Белоруссии” (1984), пераклад кнігі У. Саніна “Пункт вяртання” (1986).

Вопыт і аўтарытэт Марыі Іосіфаўны запатрабаваны і сёння: яна плённа працуе ў складзе рэдакцыйнай калегіі часопіса “Алеся”, у 2012 г. стала пераможцам VIII Нацыянальнага конкурсу друкаваных сродкаў масавай інфармацыі “Золотая Литера” ў намінацыі “За вклад в развитие журналистики”.

Матэрыял падрыхтаваны ў 2012 г. Капыльскай цэнтральнай раённай бібліятэкай імя А. Астрэйкі.