Емяльянаў Мікалай Генадзьевіч

Дата нараджэння: 11.03.1947 Расія

Дата смерці: 21.05.2019

Кароткая даведка: акцёр тэатра, заслужаны артыст Беларусі, уладальнік знака Міністэрства культуры Рэспублікі Беларусь "За ўклад у развіццё культуры Беларусі" (2012)

Імёны на іншых мовах: Емельянов Николай Геннадьевич (руская);

Емяльянаў Мікалай Генадзьевіч нарадзіўся ў Ніжнім Ноўгарадзе (Расія). У 1972 г. скончыў Горкаўскае тэатральнае вучылішча. Пасля атрымання дыплома працаваў у Пензенскім абласным драматычным тэатры. З 1979 г. творчы шлях акцёра звязаны з Гродзенскім абласным драматычным тэатрам. З 1992 па 1999 г. М. Г. Емяльянаў быў яго дырэктарам. Сярод ранніх роляў найбольш значнымі з’яўляюцца Алег («Стары дом» А. Казанцава), Міхаіл («Зыкавы» М. Горкага), Ільмар («Вячэра на пяцярых» Э. Ветэмаа). Яго героі вылучаліся абвостраным самаадчуваннем, няўстойлівым характарам, які паступова станавіўся больш сталым, эмацыянальна насычаным, разважлівым. Мастацкая творчасць М. Г. Емяльянава вызначаецца тонкай псіхалагічнай распрацоўкай характараў, што асабліва выявілася ў ролях Лапахіна і Трыторына («Вішнёвы сад» і «Чайка» А. Чэхава), Мастакова і Храпава («Стары» і «Васа Жалязнова» М. Горкага), Галядкіна («Двайнік» паводле Ф. Дастаеўскага), Н. Дж. («Лаліта» Э. Олбі паводле У. Набокава), Арагона («Тафцюр» Мальера), Ісідоры («К’ёджынскія перапалкі» К. Гальдоні), Кіраўніка («№ 13 Р. Куні), Капітана Бернарды («Хітрыкі кахання» Лопэ дэ Вэгі), Доктара Співі («Палёт над гняздом зязюлі» Д. Васермана). Супярэчлівы стан герояў перадаецца праз знешнюю стрыманасць манеры выканання.

Выканальніцкай манеры М.Г. Емяльянава быў уласцівы лірычны падтэкст, ён шматгранна прадстаўляў свайго героя, надаваў яму востратэатральную форму. Творчым дасягненнем сталі яго выступленні ў ролях Луі Бежара («Здурнелы Журдэн» М. Булгакава) і Ігара («Таццяна» («Пакуль яна памірала») Н. Птушкінай). Яскравасцю і творчай фантазіяй вылучаюцца Маляр («Дзікі Анёл» А. Каламійца), Баба Яга («Васіліса і лялька Каця» Г. Сакаловай), Марк («Вечна жывыя» В. Розава), Старшыня павяткома («Шторм» У. Біль-Белацаркоўскага), Рамахін («Заўтра была вайна» паводле Б. Васільева), Елісей («Князь Навагрудскі» Л. Пракопчыка і Д. Кальчанкі), Бухарын («Далей…далей…далей…» М. Шатрова), Мікалай II («Змова» А.М. Талстога і П. Шчогалева), Джон Проктар («Салемскія вядзьмаркі» А. Мілера), Андрэй («Мужчыны і… жанчыны» М. Задорнава).

У 1988 г. М. Г. Емельянаву прысвоена званне заслужанага артыста Беларусі.

Матэрыял падрыхтаваны ў 2021 г.