Адным з прызнаных у навуковых колах аўтарытэтных спецыялістаў у галіне фізікі плазмы стаў Антон Антонавіч Лабуда.

Нарадзіўся ён 9 красавіка 1923 г. у сялянскай сям’і ў в. Бакуны Пружанскага павета Палескага ваяводства (цяпер Пружанскі раён Брэсцкай вобласці). Сярэднюю адукацыю атрымаў у Пружанскай гімназіі. У 1944 г. прызваны ў армію. Вызначыўся ў баях пад Кёнігсбергам, ваяваў у Манчжурыі. За праяўлены гераізм і мужнасць быў узнагароджаны ордэнамі Чырвонай Зоркі, Славы ІІІ ступені (1945), Айчыннай вайны ІІ ступені (1985), медалямі «За ўзяцце Кёнігсберга», «За перамогу над Германіяй у Вялікай Айчыннай вайне 1941–1945 гг.», «За перамогу над Японіяй».

Пасля дэмабілізацыі А. А. Лабуда скончыў Пружанскае педагагічнае вучылішча, працаваў настаўнікам пачатковай школы. У 1949 г. паступіў на фізічнае аддзяленне фізіка-матэматычнага факультэта Беларускага дзяржаўнага ўніверсітэта (БДУ), затым паспяхова завяршыў навучанне ў аспірантуры. З 1957 г. яго працоўная дзейнасць звязана з БДУ: асістэнт, дацэнт кафедры эксперыментальнай фізікі і фізічнай электронікі, намеснік дэкана фізічнага факультэта па навуковай працы, дэкан факультэта радыёфізікі і электронікі, загадчык і прафесар кафедры фізічнай электронікі.

Сферай навуковых інтарэсаў Антона Антонавіча сталі фізіка і дыягностыка нізкатэмпературнай плазмы і яе прымяненне ў электроніцы і мікраэлектроніцы. Вучоны абараніў кандыдацкую дысертацыю на тэму «Даследаванне імпульснага разраду праз тонкі металічны дрот» (1959) і доктарскую дысертацыю «Спектральна-аптычная дыягностыка плазмы для мэтаў мікраэлектронікі» (1988). Выступаў з дакладамі і лекцыямі па сваёй тэме на міжнародных канферэнцыях, у навуковых цэнтрах СССР і краін Еўропы. Вынікам гэтага плённага навуковага супрацоўніцтва стала яго абранне членам Польскага вакуумнага навуковага таварыства, карэспандэнтам Міжнароднага радыёфізічнага таварыства. Удзельнічаў таксама ў рабоце савета па абароне дысертацый, экспертнага савета Фонда фундаментальных даследаванняў Рэспублікі Беларусь.

У 1980 г. па ініцыятыве А. А. Лабуды было створана вучэбнае навукова-вытворчае аб’яднанне «БДУ–НВА “Інтэграл”». Пачалася мэтавая падрыхтоўка спецыялістаў па мікраэлектроніцы, быў адкрыты філіял кафедры фізічнай электронікі, арганізавана навукова-даследчая лабараторыя спектральнага кантролю ў плазменнай тэхналогіі. Пад яго навуковым кіраўніцтвам тут распрацоўваліся сістэмы спектральнага кантролю і аўтаматычнага ўпраўлення, якія дэманстраваліся на рэспубліканскіх і міжнародных выстаўках, паспяхова ўкараняліся ў вытворчасць. Вучоны атрымаў 10 пасведчанняў на вынаходніцтвы, стаў суаўтарам больш за 230 навуковых публікацый – вучэбна-метадычных дапаможнікаў, курсаў лекцый, артыкулаў. Сярод найбольш значных з іх – «Фізічная мікраэлектроніка» (2001) і «Радыёэлектроніка» (2002). За шматгадовую навукова-педагагічную і арганізацыйную дзейнасць А. А. Лабудзе прысвоена ганаровае званне «Заслужаны работнiк народнай адукацыi Рэспублікі Беларусь».

Памёр вучоны 8 красавіка 2011 г.

Матэрыял падрыхтаваны ў 2026 г.