Багаткевіч Мечыслаў - Беларусь у асобах i падзеях

Багаткевіч Мечыслаў

Дата нараджэння: 01.01.1904 Пастаўскі раён, Віцебская вобласць

Дата смерці: 04.03.1942 Глыбоцкі раён, Віцебская вобласць

Кароткая даведка: рэлігійны дзеяч, блажэнны Рымска-каталіцкай царквы

Варыянты імя: Багаткевіч Мечыслаў Станіслававіч

Імёны на іншых мовах: Богаткевич Мечислав Станиславович (руская);

Мечыслаў Багаткевіч нарадзіўся ў маёнтку Крыкалы Вілейскага павета Віленскай губерні (цяпер Пастаўскі раён Віцебскай вобласці). Пачатковую школу скончыў у в. Сітцы, куды пераехала сям’я. Вучыўся ў Будслаўскай беларускай гімназіі, потым у польскай у Докшыцах. Пасля заканчэння паступіў у Вышэйшую духоўную семінарыю, якая знаходзілася ў Навагрудку, а ў 1925 г. была переведзена ў Пінск. Вялікі ўплыў на духоўнае развіццё М. Багаткевіча аказалі Я. Васілеўскі (рэктар семінарыі) і яе заснавальнік біскуп З. Лазінскі. Атрымаўшы філасофска-тэалагічную адукацыю, М. Багаткевіч працягваў вучобу на гуманітарным факультэце педагагічнага аддзялення Варшаўскага ўніверсітэта. 23 ліпеня 1933 г. стаў каталіцкім святаром. Служыў у Драгічыне Надбужскім выхавацелем у Ніжэйшай духоўнай семінарыі. У 1936–1939 гг. з’яўляўся прэфектам дзяржаўнай гімназіі імя Уладзіслава Ягайлы ў Лунінцы, дзе выкладаў гісторыю касцёла і этыку. Малады святар выхоўваў у моладзі розных веравызнанняў пачуццё таварыства, пашану да чалавека і ўменне абараняць яго годнасць, заклікаў прытрымлівацца агульнахрысціянскіх каштоўнасцей.

У пачатку Другой сусветнай вайны ён пераехаў да свайго малодшага брата Станіслава, які быў пробашчам у в. Пушкі Віленскай архідыяцэзіі. Даведаўшыся, што ў суседняй парафіі у в. Пеліканы (уваходзіла ў Браслаўскі дэканат) няма святара, М. Багаткевіч пачаў служыць там. У казаннях заклікаў праяўляць міласэрнасць і чалавечнасць нават у адказ на жорсткасць, клапаціўся пра бедных. Ён вельмі выразна акрэсліў сваё стаўленне да нямецкага нацыянал-сацыялізму, і калі ў верасні 1939 г. гітлераўская Германія напала на Польшчу, рэзка асудзіў гэта. У лістападзе 1941 г. М. Багаткевіч выехаў у Дрысу, якая знаходзілася пад нямецкай акупацыяй. У сваіх казаннях ён вучыў вернікаў, як у цяжкі ваенны час жыць у згодзе з сумленнем. Гэта не спадабалася нямецкім уладам. 16 студзеня 1942 г. М. Багаткевіч быў арыштаваны. Яго адправілі ў Браслаў, потым у Глыбокае ў камеру смяротнікаў. 4 сакавіка 1942 г. святара расстралялі ва ўрочышчы Барок каля Глыбокага.

Мечыслаў Багаткевіч пражыў усяго 38 гадоў, 9 з якіх прысвяціў служэнню Богу. 13 чэрвеня 1999 г. ён быў беатыфікаваны.

Матэрыял падрыхтаваны ў 2026 г.