Герой Савецкага Саюза Ульмас Шакіравіч Шакіраў нарадзіўся ў Башкортастане (цяпер Рэспубліка Башкортастан, Расія) у сялянскай сям’і. У 1938 г. скончыў сямігодку і пайшоў працаваць у калгас. У ліпені 1941 г. юнаку споўнілася 19 гадоў і яго прызвалі ў армію, а ў лістападзе 1941 г. радавы Ульмас Шакіраў прымаў удзел у бітве за Маскву ў складзе 259-га стралковага палка 43-й арміі. Потым ваяваў на Калінінскім, 1-ым Прыбалтыйскім і 3-ім Беларускім франтах, вызваляў Калінін, Вялікія Лукі, землі Беларусі і Прыбалтыкі.

23 чэрвеня 1944 г. памочнік камандзіра стралковага ўзвода старшы сяржант У.Ш. Шакіраў вызначыўся ў баях падчас прарыву абароны праціўніка ў Сіроцінскім раёне каля г.п. Шуміліна Віцебскай вобласці. Калі камандзір узвода быў паранены і не змог кіраваць наступленнем, Ульмас Шакіраў прыняў камандаванне на сябе, узвод адбіў 3 контратакі праціўніка і нанёс значны ўрон гітлераўцам. 26 чэрвеня ўзвод на чале з У. Шакіравым фарсіраваў Заходнюю Дзвіну, паранены Ульмас Шакіраў узяў у палон атрад нямецкіх разведчыкаў колькасцю 11 чалавек, у складзе якога было два афіцэры. Указам Прэзідыума Вярхоўнага Савета СССР ад 22 ліпеня 1944 г. за ўзорнае выкананне заданняў камандавання і праяўленую мужнасць і гераізм у баях з нямецка-фашысцкімі захопнікамі старшаму сяржанту Шакіраву Ульмасу Шакіравічу было прысвоена званне Героя Савецкага Саюза з уручэннем ордэна Леніна і медаля “Залатая Зорка”. Сярод баявых узнагарод У. Шакірава быў і ордэн Айчыннай вайны І ступені.

Пасля вайны Ульмас Шакіраў вярнуўся ў родныя мясціны, дзе працаваў ваенруком у Асаеўскай школе Башкірскай АССР. З 1950 г. паспяхова працаваў старшынёй калгаса, а восенню 1959 г. вярнуўся ў родную школу настаўнікам фізічнай культуры і працоўнага навучання. Пасляваеннае жыццё Ульмас Шакіравіч прысвяціў выхаванню моладзі. За дабрасумленную працу ў сферы адукацыі быў узнагароджаны знакам “Выдатнік народнай асветы”.

Імем героя названа вуліца ў в. Асаўка (Рэспубліка Башкортастан) і муніцыпальная агульнаадукацыйная бюджэтная ўстанова асноўная агульнаадукацыйная школа. У 2005 г. вясковая бібліятэка атрымала статус “Бібліятэка-музей імя У. Шакірава”.

Матэрыял падрыхтаваны ў 2012 г.