Анатоль Герасімавіч Цікавенка нарадзіўся ў в. Новая Алешня Рагачоўскага раёна Гомельскай вобласці. У 1977 г. скончыў юрыдычны факультэт Беларускага дзяржаўнага ўніверсітэта імя У.І. Леніна (БДУ). Вучобу працягваў у аспірантуры Інстытута дзяржавы і права АН СССР (Масква), дзе ў 1981 г. абараніў кандыдацкую дысертацыю на тэму «Служебные отношения между начальником и подчиненным в аппарате государственного управления». З 1981 па 1986 г. працаваў памочнікам прэзідэнта АН БССР, потым быў старшым навуковым супрацоўнікам Інстытута філасофіі і права АН БССР. У 1989–1992 гг. з'яўляўся дактарантам БДУ. У 1993 г. А.Г. Цікавенка абараніў доктарскую дысертацыю на тэму «Теоретические проблемы авторитета государственной власти». У 1995 г. стаў прафесарам і ўзначаліў лабараторыю Навукова-даследчага цэнтра праблем дзяржаўнай кадравай палітыкі і ўдасканальвання дзяржаўнага кіравання Акадэміі кіравання пры Прэзідэнце Рэспублікі Беларусь. У 1997 г. прызначаны суддзёй Канстытуцыйнага суда Рэспублікі Беларусь. Адначасова А.Г. Цікавенка выкладае на кафедры тэорыі і гісторыі дзяржавы і права юрыдычнага факультэтаэ БДУ. Ён з'яўляецца таксама членам некалькіх саветаў па абароне дысертацый у галіне юрыдычных навук. У складзе часовых творчых калектываў удзельнічаў у распрацоўцы многіх заканадаўчых актаў. Спецыялізуецца ў галіне тэорыі дзяржавы і дзяржаўнай улады, канстытуцыйнага і адміністрацыйнага права. Ён з'яўляецца аўтарам каля 160 навуковых работ, сярод якіх – «Начальник и подчиненный: правовые аспекты служебных отношений» (1984), «Кадровая политика в условиях перестройки» (1990), «Авторитет власти: прошлое и настоящее» (1992) і інш. У 2005 г. выпусціў вучэбны дапаможнік «Конституционное право зарубежных стран».

Анатоль Герасімавіч Цікавенка мае вышэйшы кваліфікацыйны клас суддзі. За плённую працу ў красавіку 1999 г. яму была аб'яўлена падзяка Прэзідэнта Рэспублікі Беларусь, у 2002 г. прысвоена ганаровае званне «Заслужаны юрыст Рэспублікі Беларусь».

Матэрыял падрыхтаваны ў 2017 г.