Беларускі мовазнавец Вячаслаў Канстанцінавіч Шчэрбін нарадзіўся ў в. Рудня-Антонаўская Калінкавіцкага раёна Гомельскай вобласці. Вышэйшую адукацыю атрымаў на філалагічным факультэце Беларускага дзяржаўнага ўніверсітэта. Вучыўся ў аспірантуры пры Інстытуце мовазнаўства імя Якуба Коласа НАН Беларусі. Працаваў у Інстытуце мовазнаўства імя Якуба Коласа НАН Беларусі, Мінскім дзяржаўным лінгвістычным універсітэце, Акадэміі кіравання пры Прэзідэнце Рэспублікі Беларусь. З'яўляўся віцэ-прэзідэнтам Беларускай асацыяцыі камунікатыўнай лінгвістыкі, вучоным сакратаром Падкамітэта па Дзяржаўных прэміях Рэспублікі Беларусь у галіне навукі і тэхнікі, вучоным сакратаром Камітэта па гуманітарных і сацыяльных навуках Міжнароднай асацыяцыі акадэмій навук, членам Вучонага савета Аддзела навуковай інфармацыі па гуманітарных навуках НАН Беларусі. З 1999 г. працуе ў Цэнтры сістэмнага аналізу і стратэгічных даследаванняў НАН Беларусі (у 2004–2005 гг. быў намеснікам дырэктара).

Навуковыя інтарэсы ў галіне беларускай лексікалогіі і лексікаграфіі, функцыянальнай граматыкі, сацыялінгвістыкі, тыпалагічнага і супастаўляльнага мовазнаўства, гісторыі айчыннага мовазнаўства. Пільная цікавасць В.К. Шчэрбіна да тэарэтычных і практычных праблем беларускай лексікаграфіі тлумачыцца не толькі яго чыста прафесійнымі інтарэсамі, але і імклівым павышэннем грамадскага значэння слоўнікавай работы. Да ліку кніг аб беларускіх словах і слоўніках адносяцца такія, як «Вселенная в алфавитном порядке : словари – вчера, сегодня, завтра» (1987), «Общество – язык – политика» (1988, у суаўтарстве), «Беларускае слова ў тэксце і ў сістэме мовы» (1994, пад рэдакцыяй), «Гісторыя беларускай лексікаграфіі» (1994), «Русско-белорусский словарь математических, физических и технических терминов» (1995, у суаўтарстве). Далейшым працягам шматгадовых даследаванняў у галіне беларускай лексікалогіі і лексікаграфіі стала манаграфія «Тэарэтычныя праблемы беларускай лексікаграфіі» (1996). Вучоны з'яўляецца аўтарам кніг «Комплексный науковедческий анализ деятельности Белорусского республиканского фонда фундаментальных исследований в 1991–2006 гг.» (2008), «Инфраструктурные составляющие инновационной экономики» (2010) і іншых, а таксама ўдзельнічаў у падрыхтоўцы выданняў «Гуманитаризация науки и образования в переходный период» (2000), «Наука и техника Беларуси: хронология важнейших событий и дат (IX – начало XX ст.)» (2005). У 1998 г. В.К. Шчэрбін стаў лаўрэатам Дзяржаўнай прэміі Беларусі.

Матэрыял падрыхтаваны ў 2013 г.