Марат Гумеравіч Ясавееў нарадзіўся ў Маладзечне. У 1959 г. сям’я пераехала ў Мінск. Скончыў школу з геалагічным профілем навучання. У 1966‒1969 гг. вучыўся на геолага-геаграфічным факультэце Беларускага дзяржаўнага ўніверсітэта імя У. І. Леніна (БДУ), затым быў пераведзены на геалагічны факультэт Кіеўскага дзяржаўнага ўніверсітэта імя Т. Шаўчэнкі, які скончыў у 1971 г. Пасля атрымання дыплома працаваў у геалагічнай партыі Беларускім дзяржаўным інстытуце інжынерных пошукаў (1971‒1974). У 1975‒1999 г. быў навуковым супрацоўнікам Інстытута геалагічных навук Нацыянальнай акадэміі навук Беларусі. У 1983 г. абараніў кандыдацкую дысертацыю на тэму «Гидрогеология и промышленные рассолы Припятского прогиба», у 1998 г. ‒ доктарскую на тэму «Подземная гидросфера Беларуси (строение, экология, рациональное использование)». З 1999 па 2003 г. працаваў загадчыкам лабараторыі геаэкалагічных праблем геаграфічнага факультэта БДУ. З 2003 па 2006 г. быў дэканам факультэта прыродазнаўства Беларускага дзяржаўнага педагагічнага ўніверсітэта імя М. Танка, затым загадваў кафедрай эканамічнай геаграфіі і аховы прыроды. У 2016 г. перайшоў у Міжнародны дзяржаўны экалагічны інстытут імя А. Д. Сахарава, спачатку з’яўляўся прафесарам кафедры агульнай экалогіі, а з 2018 г. ‒ дэканам факультэта экалагічнай медыцыны. Затым стаў прафесарам кафедры агульнай экалогіі, біялогіі і экалагічнай генетыкі, а ў 2019 г. ‒ кафедры экалагічнага маніторынгу і менеджмента факультэта манітогынгу навакольнага асяроддзя.

Марат Гумеравіч ‒ аўтар больш за 500 навуковых прац, прысвечаных агульнай і рэгіянальнай гідрагеалогіі, мінеральным водам, ахове прыроды і маніторынгу навакольнага асяроддзя, геаэкалагічным праблемам тэхнагенеза, экалагічнай адукацыі і інш. Сярод іх ‒ «Перспективы подземного захоронения промышленных отходов на территории Белорусской ССР» (1989, у суаўтарстве), «Минеральные воды Беларуси» (1994, у суаўтарстве), «Подземные воды Беларуси» (1998, у суаўтарстве), «Природные факторы оздоровления» (2004, у суаўтарстве) і інш. Вучоны прымаў удзел у распрацоўке канцэпцыі шматузроўневай экалагічнай адукацыі ў Рэспубліке Беларусь. Пад яго кіраўніцтвам абаронена пяць кандыдацкіх дысертацый. Марат Гумеравіч унёс значны ўклад у тэарэтычнае абгрунтаванне геаэкалогіі як навукі.

У 1998 г. за цыкл прац па вывучэнні і асваенні мінеральных водаў Беларусі М. Г. Ясавееў з групай суаўтараў узнагароджаны Дзяржаўнай прэміяй Рэспублікі Беларусь.

Матэрыял падрыхтаваны ў 2023 г.