Каштоўнай крыніцай ведаў па гісторыі Беларусі з’яўляюцца помнікі даўняга пісьменнства – летапісы. У іх занатоўваліся найбольш значныя падзеі грамадска-палітычнага жыцця асобных княстваў, гарадоў, апісвалася жыццё і дзейнасць выдатных гістарычных асоб. Адным з найбольш значных помнікаў летапісання з’яўляецца Іпацьеўскі летапіс – важная крыніца па гісторыі Полацкага, Тураўскага, Кіеўскага, Галіцка-Валынскага княстваў і Вялікага Княства Літоўскага. Гэты летапісны звод быў складзены ў канцы ХІІІ ст. у паўднёвай Русі і названы ад Іпацьеўскага манастыра (каля г. Кастрама, Расія), дзе быў знойдзены ў XVIII ст. Складаецца ён з трох ранейшых летапісных твораў: «Аповесці мінулых гадоў», Кіеўскага летапісу і Галіцка-Валынскага летапісу. Іпацьеўскі летапіс збярогся ў некалькіх спісах: Іпацьеўскім, Хлебнікаўскім, Ермалаеўскім і інш.

«Аповесць мінулых гадоў» – першы агульнарускі летапісны звод, складзены ў ХІІ ст. манахам Кіева-Пячэрскага манастыра Нестарам. У «Аповесці» выкладаецца палітычная гісторыя ўсходніх славян і Кіеўскай дзяржавы ў сувязі з міжнароднымі падзеямі і гісторыяй суседніх краін, даюцца звесткі па гісторыі рускай царквы і Хрышчэнні Русі. Летапіс змяшчае ўнікальныя дадзеныя па гісторыі Полацкага княства, самыя раннія звесткі пра Полацк, Віцебск, Мінск, Тураў і іншыя беларускія гарады.

Кіеўскі летапіс – гістарычна-літаратурны помнік Кіеўскай Русі, які ахоплівае падзеі з 1118 да 1200 гг. Прысвечаны пераважна гісторыі Кіева і Кіеўскай зямлі, жыццю і дзейнасці кіеўскіх князёў. У летапісу захаваліся цікавыя і каштоўныя запісы пра важныя падзеі ў Полацкай зямлі ў сярэдзіне ХІІ ст., якія па меркаванні некаторых даследчыкаў, з’яўляюцца фрагментамі згубленага Полацкага летапісу.

Галіцка-Валынскі летапіс – помнік гістарыяграфіі, мовы і літаратуры Старажытнай Русі, які ахоплівае падзеі за 1201–1292 гг. Апошнія запісы датычацца гісторыі Пінскай зямлі. Змяшчае ўнікальныя звесткі па гісторыі Навагрудка, Брэста і іншых заходнебеларускіх гарадоў, пра асобныя помнікі беларускай культуры – заснаванне Лаўрышаўскага манастыра (Гродзенская вобл.), будаўніцтва Камянецкай вежы (Брэсцкая вобл.), пра жыццё і дзейнасць вялікіх князёў Вялікага Княства Літоўскага Міндоўга, Войшалка, Трайдзеня.

Матэрыял падрыхтаваны ў 2016 г.