Брэсцкая абласная фiлармонiя створана 6 жніўня 1986 г. на базе гастрольна-канцэртнага аддзялення Беларускай дзяржаўнай фiлармонii па Брэсцкай вобласці.

Зараз у складзе філармоніі працуюць 5 калектываў: камерны аркестр (кіраўнік А. Мартыненка), ансамбль салістаў “Берасцейцы” (кіраўнік А. Гарноўскі), фальклорны калектыў “Крэсіва” (кіраўнік А. Казак), камерна-інструментальны ансамбль “Эвергрын” (кіраўнік У. Мальганаў) і гурт “Muzzart”. Выступаюць таксама салістка-інструменталістка В. Гарноўская (віяланчэль), вакалісткі Л. Карпук і В. Хмарук, а таксама дзве канцэртна-лекцыйныя групы, якія рыхтуюць праграмы для дзяцей. Салістамі філармоніі працавалі заслужаны артыст Расіі Б. Пяцюк, заслужаны артыст Украіны Ф. Богдан, баяніст, лаўрэат міжнародных конкурсаў А. Пылік і інш.

Брэсцкая абласная філармонія з’яўляецца арганізатарам штогадовых регіянальных фестываляў “Беларуская музычная восень”, “Музычнае Палессе” (з 1995 г.), “Майстры мастацтваў – працаўнікам сяла” (з 2000 г.), цыкла канцэртаў для дзяцей “Музыканты – дзецям” (з 2000 г.).

Матэрыял падрыхтаваны Брэсцкай абласной бібліятэкай імя М. Горкага ў 2011 г.