У пачатку 1950-х гг. у нашай краіне мелася вялікая патрэба насельніцтва ў наручных і кішэнных гадзінніках, а прадпрыемства па іх вытворчасці не існавала. 22 жніўня 1953 г. была прынята пастанова Савета Міністраў СССР аб павелічэнні вытворчасці прылад для вымярэння часу. У верасні гэтага ж года Савет Міністраў БССР прыняў пастанову аб будаўніцтве ў Мінску прадпрыемства па вытворчасці гадзіннікаў. Так пачалася гісторыя Мінскага гадзіннікавага завода.

Стварэнне прадпрыемства ішло ў складаных умовах, меўся значны недахоп працоўных рук, матэрыялаў і тэхнікі. Для падрыхтоўкі кваліфікаваных спецыялістаў для новай галіны вытворчасці група мінскіх рабочых была накіравана на Пензенскі гадзіннікавы завод.

24 лістапада 1955 г. Мінскі гадзіннікавы завод пачаў сваю дзейнасць. У 1961 г. прадпрыемствам была выпушчана эксперыментальная партыя гадзіннікаў «Мінск» («Луч–1300»). У наступным годзе завод пачаў асваенне вытворчасці мужчынскіх гадзіннікаў «Вымпел», якія атрымалі назву «Луч–2209». У 1965 г. зборачныя цэхі былі пераведзены ў новыя памяшканні, што дазволіла значна палепшыць умовы працы, павысіць якасць прадукцыі. У 1970-я гг. Мінскі гадзіннікавы завод пачаў выпуск электронна-механічных наручных гадзіннікаў з аўтападзаводам і гадзіннікаў для аўтамабіляў. У пачатку 1980-х гг. прадпрыемства асвоіла выпуск мініяцюрных будзільнікаў, з 1986 г. – жаночых і мужчынскіх кварцавых гадзіннікаў з сігналам.

З 2010 г. дзякуючы намаганням швейцарскай кампаніі «Франк Мюлер Інтернэшнл Б.В.» адбылася карэнная мадэрнізацыя вытворчасці з выкарыстаннем інавацыйных тэхналогій, што дало магчымасць для стварэння гадзіннікаў, якія адпавядаюць сучасным патрабаванням.

За час свайго існавання Мінскім гадзіннікавым заводам асвоена больш за 1700 разнастайных мадэляў гадзіннікаў. Асноўная прадукцыя прадпрыемства – калекцыі механічных і кварцавых наручных гадзіннікаў для мужчын, жанчын і дзяцей. Завод вырабляе будзільнікі, аўтамабільныя гадзіннікі, тэхнічныя манометры, GPS-трэкеры і іншую прадукцыю. Правераныя тэхналогіі эфектыўна спалучаюцца з сучаснымі метадамі працы і эксклюзіўнымі распрацоўкамі дызайнераў і канструктараў.

24 лістапада 2012 г. ў Мінску адбылося адкрыццё першай спецыялізаванай крамы Мінскага гадзіннікавага завода. Сёння прадукцыю маркі «Луч» можна набыць у 12 спецыялізаваных крамах, ва ўсіх буйных гандлёвых кропках, а таксама праз інтэрнэт.