Першы нумар штодзённай грамадска-палітычнай і літаратурнай газеты праваакцябрысцкага кірунку “Могилевский вестник” выйшаў з друку 1 чэрвеня 1906 г. Выданне друкавалася Магілёўскім губернскім праўленнем (з 1913 г. – прыватнымі выдаўцамі) на рускай мове. Газета падтрымлівала палітыку царызму, асуджала рэвалюцыю, нацыянальна-вызваленчы і ліберальна-апазіцыйны рух. Друкавала даклады дэпутатаў Дзяржаўнай думы, “Словы” і “Казанні” мясцовага епіскапа, у якіх прапагандаваліся ідэі рускага праваслаўя і самадзяржаўя, асуджаліся атэізм, матэрыялізм, філасофія Л. Талстога. На сваіх старонках адмаўляла нацыянальную і этнакультурную самастойнасць беларускага народа, выступала супраць беларускай мовы, літаратуры, кнігадрукавання, імкнулась ачарніць першыя кнігі беларускіх пісьменнікаў, абвінавачвала ў сепаратызме газеты “Наша доля” і “Наша ніва”, даводзіла “непатрэбнасць” і “шкоднасць” не толькі палітычнай, але і культурнай аўтаноміі для беларусаў. Пасля Лютаўскай рэвалюцыі 1917 г. перайшла на пазіцыі памяркоўнага “буржуазнага” лібералізму, выступала ў падтрымку Часовага ўрада.

Сярод публікацый былі навукова-папулярныя, этнаграфічныя і краязнаўчыя артыкулы, вершы, апавяданні і нарысы мясцовых аўтараў (пераважна даследаванні рэлігійнага і афіцыйна-патрыятычнага зместу), артыкулы па пытаннях народнай адукацыі і стану аховы здароўя ў губерні. Газета інфармавала аб навінах музычнага і тэатральнага жыцця Магілёва, культурна-асветніцкай дзейнасці; прапагандавала рускую літаратурна-мастацкую спадчыну, але замоўчвала сацыяльна-крытычную накіраванасць твораў, у літаратурных аглядах выступала за ідэалізацыю жыцця і лакіроўку рэчаіснасці. Тэндэнцыйна абвінавачвала М. Горкага, С. Сяргеева-Цэнскага, С. Найдзёнава ў натуралізме і дэкадэнцтве. Адмоўна ставілася да футурызму і іншых авангардысцкіх накірункаў, але ў асобных артыкулах прызнавала наватарства У. Меерхольда. У газетных публікацыях адзначаліся заслугі Е. Раманава і М. Доўнар-Запольскага ў даследаванні беларускага фальклору, зрэдку друкаваліся ўзоры нацыянальнай вуснапаэтычнай творчасці.

У якасці дадаткаў да газеты выдаваліся часопісы “Вестник земского хозяйства Могилёвской губернии” (1907–1908) і “Листок Коммерческого отдела Могилёвского общества” (1907–1909).

Рэдактарамі “Могилевского вестника” ў розныя часы працавалі: М. І. Пілін, М. Дыджакос, М. М. Сталеўскі, Г. П. Пажараў, А. Е. Адамец, П. А. Маркаў і інш.

Матэрыял падрыхтаваны Магілёўскай абласной бібліятэкай імя У. І. Леніна ў 2011 г.