Адзін з найстарэйшых музеяў Гомельскай вобласці Тураўскі краязнаўчы музей быў заснаваны ў 1927 г. на базе школьнага гуртка гісторыі і прыроды. У яго фондах захоўваліся зборы друкаваных і рукапісных кніг, прадметы дэкаратыўна-прыкладнога мастацтва, этнаграфічная калекцыя. У час Вялікай Айчыннай вайны ўсе матэрыялы былі страчаны. Да снежня 1949 г. новая музейная калекцыя збіралася і экспанавалася ў доме П. Шчакатовіча. Музей зноў быў адкрыты для наведвальнікаў у 1950 г. Адноўлены музей набыў статус самастойнай установы. У 1954–1956 гг. з'яўляўся філіялам Гомельскага абласнога краязнаўчага музея. У розныя гады музеем кіравалі М. Е. Бруй, П. А. Шчакатовіч, Р. І. Запясоцкая, В. М. Карась, Г. І. Кірыленка, В. М. Папок. Зараз дырэктарам з'яўляецца Д. Э. Апановіч.

Плошча экспазіцыі займае 328 кв. м. Асноўны фонд музея налічвае больш за 11 тыс. адзінак захоўвання, навукова-дапаможны – звыш 8 тыс. (даныя на 2015 г.). Установа мае 4 экспазіцыйныя залы (старажытнасці, этнаграфіі і быта, Вялікай Айчыннай вайны, прыроды) і адну выставачную. У музеі зберагаюцца калекцыі археалагічных знаходак з раскопак на тэрыторыі горада і раёна, нумізматыкі, жывапісу, а таксама друкаваныя і рукапісныя матэрыялы і дакументы, фотаздымкі. Экспазіцыя складаецца з раздзелаў: гісторыя старажытнага Турава і жыццё і дзейнасць рэлігійнага асветніка Кірылы Тураўскага, паўсядзённы побыт гараджан у канцы ХIХ–пачатку ХХ ст., падзеі Кастрычніцкай рэвалюцыі і грамадзянскай вайны, усталяванне савецкай улады, калектывізацыя, барацьба з непісьменнасцю на Тураўшчыне, дзейнасць камсамольска-маладзёжнага антыфашысцкага падполля і партызанскага атрада «За Радзіму» ў Вялікую Айчынную вайну, вызваленне Чырвонай Арміяй ад нямецка-фашысцкіх захопнікаў, пасляваеннае аднаўленне і развіццё прамысловасці і сельскай гаспадаркі, этнаграфія і дэкаратыўна-прыкладное мастацтва, прырода і інш. У ліку найбольш цікавых экспанатаў калекцыі каменных сякер бронзавага веку II тыс. да н.э., шыферных прасліц ХI–ХIII стст., манеты князя Святаполка, саркафаг з раскопак сабора ХII ст. на Тураўскім гарадзішчы, каляровыя фотакопіі Тураўскага Евангелля, фотаздымкі і творы з аўтографамі М. Гамолкі, У. Агіевіча, Н. Перкіна і інш. Прадстаўлены ўзоры флоры і фаўны нацыянальнага парка «Прыпяцкі», карысных выкапняў рэгіёна.

Па ініцыятыве музея ў 1961 г. на гарадзішчы Турава праведзены першыя буйныя археалагічныя даследаванні Тураўскім атрадам АН СССР. Быў знойдзены падмурак сярэдневяковага цаглянага храма. У цяперашні час скрыпта над фундаментам храма ХII ст. з'яўляецца цэнтральным экспанатам гісторыка-археалагічнага комплексу «Старажытны Тураў», які ўваходзіць у склад музея. У Тураўскім краязнаўчым музеі праводзяцца аглядавыя і тэматычныя экскурсіі, сустрэчы з ветэранамі вайны і працы, воінамі-інтэрнацыяналістамі.

Матэрыял падрыхтаваны ў 2017 г.