Нараўлянскі этнаграфічны музей заснаваны паводле рашэння Нараўлянскага райвыканкама №194 ад 31.12.1991 г. у г. Нароўля на базе грамадскага музея пры Доме піянераў. Адкрыты для наведвальнікаў 08.05.1995 г. Размешчаны ў будынку, які з’яўляецца помнікам драўлянага дойлідства канца ХІХ ст.

Музей налічвае звыш 3000 экспанатаў асноўнага фонду. Сярод экспанатаў – прылады ткацтва, рыбалоўства, бондарства, вырабы пляцення з бяросты, лазы, лубу, тканыя арнаментаваныя ручнікі, посцілкі і інш. Зберагаецца калекцыя ікон, псалтыры, жыццеапісанні, песеннікі. Прапануецца інфармацыя аб страчаных храмах і тых, якія дзейнічаюць сёння.

Экспазіцыя прадстаўлена ў наступных залах: “Сялянская святліца”, “Зала прыроды Палесся”, “Сялянскі падворак”, “Зала рамёстваў і промыслаў”, “Зала ткацтва”, “Чарнобыльская зала”. У апошняй змешчаны матэрыялы аб 36 адселеных вёсках раёна, дыярама панарамы адселенай вёскі Даўляды, карціны мастака В. Шматава, прысвечаныя чарнобыльскай тэматыцы, – “Чорная быль”, “Чорнае дрэва” і інш. У зале “Мая Нараўляншчына” прадстаўлены жывапіс Юрыя Фісюка. У выставачнай зале экспануюцца працы мастакоў і майстроў дэкаратыўна-прыкладнога мастацтва Нараўляншчыны.

Сёння Нараўлянскі этнаграфічны музей – даследчы і асветніцкі цэнтр, які прапануе разнастайныя экскурсіі, музейныя заняткі, праводзіць дні памяці і дні адкрытых дзвярэй, ажыццяўляе разнастайныя музейныя праекты. Найбольш адметным праектам апошніх гадоў з’яўляецца праект “Знакамітыя землякі”.

Матэрыял падрыхтаваны ў 2015 г.