Пастановай Савета Міністраў Беларускай ССР ад 4 мая 1963 г. у Клічаве быў створаны Магілёўскі тэхнікум механізацыі сельскай гаспадаркі. У 1974 г. на базе тэхнікума і саўгасаў «Зара» і «Красінскі» быў створаны Магілёўскі саўгас-тэхнікум, які ў 1999 г. быў рэарганізаваны ў Клічаўскі сельскагаспадарчы тэхнікум і саўгас «Ольса». У 2001 г. тэхнікум стаў аграрна-тэхнічным каледжам. Сёння Установа адукацыі «Клічаўскі дзяржаўны аграрна-тэхнічны каледж» падпарадкоўваецца непасрэдна Міністэрству сельскай гаспадаркі і харчавання Рэспублікі Беларусь.

Клічаўскі аграрна-тэхнічны каледж – сучасная сярэдняя спецыяльная навучальная ўстанова сельскагаспадарчага профілю, дзе працуе больш за 90 высокакваліфікаваных выкладчыкаў. Каледж з’яўляецца адной з вядучых навучальных устаноў па падрыхтоўцы спецыялістаў у галіне аграрна-прамысловага комплексу. На дзённай і завочнай формах навучання займаецца каля 800 навучэнцаў. Падрыхтоўка спецыялістаў вядзецца па наступных спецыяльнасцях: «Тэхнічнае забеспячэнне працэсаў сельскагаспадарчай вытворчасці», «Энергетычнае забеспячэнне сельскагаспадарчай вытворчасці», «Рамонтна-абслугоўваючая вытворчасць у сельскай гаспадарцы». Каледж мае сучасныя вучэбна-вытворчыя памяшканні для тэарэтычных і практычных заняткаў: 23 вучэбных кабінеты, 24 лабараторыі, вучэбна-практычныя майстэрні, вучэбна-доследнае поле, музей і інш.

Неад’емнай часткай працэсу навучання з’яўляецца інжынерна-тэхнічная творчасць. Каледж мае сучасную лабараторыю, аснашчаную неабходным абсталяваннем, дзе навучэнцы маюць магчымасць распрацоўваць і ўдасканальваць прылады і прыстасаванні для жывёлагадоўлі і раслінаводства. У 2007 г. за распрацоўку і выраб энергазберагальнай устаноўкі, якая працуе на мясцовых відах паліва, Клічаўскі аграрна-тэхнічны каледж быў узнагароджаны дыпломам першай ступені Рэспубліканскага агляду тэхнічнай творчасці навучэнцаў Міністэрства адукацыі Рэспублікі Беларусь.

Значная ўвага надаецца спартыўнаму выхаванню навучэнцаў. Спартыўная база Клічаўскага дзяржаўнага аграрна-тэхнічнага каледжа з’яўляецца адной з лепшых сярод сярэдніх спецыяльных устаноў Магілёўскай вобласці. Навучэнцы маюць магчымасць займацца футболам, хакеем, тэнісам, гандболам, валейболам, міні-футболам. Спартыўныя каманды каледжа паспяхова ўдзельнічаюць у спаборніцтвах сярод сярэдніх спецыяльных навучальных устаноў Магілёўскай вобласці па розных відах спорту.

У верасні 2011 г. на базе Клічаўскага дзяржаўнага аграрна-тэхнічнага каледжа была адкрыта экспазіцыя тэхнікі, рамёстваў і быту «Сялянская сядзіба». Этнаграфічная калекцыя складаецца з інвентара, прылад працы, прадметаў побыту, тэхнічных сродкаў, якія выкарыстоўваліся земляробамі, цеслярамі, кавалямі і ганчарамі ў ХІ–ХХ стст. Сярод экспанатаў выставы сельскагаспадарчая тэхніка даваеннага і пасляваенага перыядаў ХХ ст. Выстава прызначана выхоўваць павагу да традыцый, таленту беларускага народа, спрыяць фарміраванню ў будучых спецыялістаў-аграрыяў цікавасці да абранай прафесіі.

За гады свайго існавання Клічаўскі аграрна-тэхнічны каледж падрыхтаваў больш за 12 тыс. спецыялістаў для аграрна-прамысловага комплексу Беларусі. Выпускнікі гэтай навучальнай установы працуюць ва ўсіх галінах народнай гаспадаркі краіны. Адукацыйны працэс, наладжаны ў Клічаўскім аграрна-тэхнічным каледжы, характарызуецца грунтоўнасцю падрыхтоўкі спецыялістаў-аграрыяў і абапіраецца на выкарыстанне сучасных адукацыйных тэхналогій. Выдатная арганізацыя працэсу навучання ў Клічаўскім дзяржаўным аграрна-тэхнічным каледжы адзначана Ганаровымі граматамі Палаты прадстаўнікоў і Савета Рэспублікі Нацыянальнага сходу Рэспублікі Беларусь (2003).

Матэрыял падрыхтаваны ў 2013 г.