Адкрытае акцыянернае таварыства "Мазырсельмаш" пачало працаваць у 1924 г. у Мазыры (Гомельская вобласць). Менавіта тады мясцовыя кавалі аб’ядналіся ў адзіны калектыў, які вырабляў калёсы, ланцугі, багры, якары, бароны, тапары і бляшаны посуд. У 1928 г. прадпрыемства ў складзе 14 чалавек атрымала назву Арцель “Молат”. У гады Вялікай Айчыннай вайны абсталяванне часткова эвакуіравана, часткова знішчана. У 1944 г. вытворчасць адноўлена і пашырана, асвоены выпуск ручных веялак, прасаў, цвікоў, пячного ліцця. У далейшым арцель пераўтворана ў завод “Молат”, Мазырскі ліцейна-механічны завод (1956), Мазырскі завод машынабудавання для птушкагадоўчых комплексаў і ферм “Мазырптушкамаш” (1974). У гэты перыяд прадпрыемства выпускала таксама жалезныя ложкі, паразапорную апаратуру, саломарэзкі, цеплагенератары.

З 1988 г. прадпрыемства працуе як Мазырскі завод сельскагаспадарчага машынабудавання ("Мазырсельмаш"). Асноўнай яго прадукцыяй з’яўляюцца бытавыя катлы для ацяплення жылых дамоў, вадагрэйныя калонкі, цеплагенератары для паветранага ацяплення і вентыляцыі сельскагаспадарчых і іншых аб’ектаў, воданагравальныя ўстаноўкі для вадзянога ацяплення будынкаў і для атрымання гарачай вады. Завод пастаўляе сваю прадукцыю ў сельскагаспадарчую і будаўнічую галіны прамысловасці, удзельнічае ў дзяржаўных праграмах, неаднаразова адзначаўся дыпломамі выставак за якасць.

Матэрыял падрыхтаваны ў 2025 г.