Клецкі механічны завод быў заснаваны ў 1969 г. як філіял Вытворчага аб’яднання імя У.І. Леніна і размясціўся ў будынку былой царквы. Побач былі пабудаваныя сталовая і адміністрацыйны корпус (цяпер тут размяшчаецца інтэрнат для работнікаў завода). З 2001 г. прадпрыемства мела назву УП «Клецкі механічны завод» ААТ «Мінскі прыборабудаўнічы завод», з 2007 г. – РПУП «Клецкі мехзавод». 12 лютага 2009 г. завод пераўтвораны ў ААТ «Клецкі мехзавод» і ўвайшоў у склад холдынга «БелаўтаМАЗ».

Асноўнымі відамі дзейнасці прадпрыемства з’яўляюцца вытворчасць жгутавай прадукцыі для аўтобусаў і аўтамабіляў Мінскага аўтамабільнага завода; металічных вырабаў; запчастак для сельскагаспадарчых машын і інш. У каталогу прадукцыі завода – 3 тыс. найменняў жгутоў: электрычных, электронных, сілавых; металаканструкцыі (рашоткі, агароджы); абсталяванне для жывёлагадоўлі; кантэйнеры для збору смецця; запасныя часткі да сеялак і аўтамабіляў; металічныя канструкцыі для спартыўных пляцовак; аб’ёмныя светлавыя фігуры і арт-аб’екты. Сучаснае высокапрадукцыйнае абсталяванне дазваляе своечасова пастаўляць заказчыкам прадукцыю высокай якасці і задавальняць патрэбы нацыянальнай эканомікі.

Матэрыял падрыхтаваны ў 2023 г.