Азёрны (з 2007 г. гідралагічны) заказнік рэспубліканскага значэння "Крывое" быў створаны ва Ушацкім раёне Віцебскай вобласці ў 1979 г. Мэтай заснавання стала зберажэнне ў натуральным стане аднайменнага возера і прылеглых да яго прыродных комплексаў.

Ахоўная тэрыторыя плошчай больш за 1 тыс. га размешчана на паўднёвым усходзе Полацкай нізіны. Берагі глыбакаводнага возера (найбольшая глыбіня 31 м) параслі хмызняком, часткова забалочаны і зарастаюць трыснягом і чаротам. У вадзе пашыраны рдзесты, эладэя, рагаліснік, імхі, водзяцца судак, лешч, гусцяра, шчупак, акунь, язь, плотка, лінь, сняток, трапляецца ахоўны від – рапушка еўрапейская. У возера ўпадаюць пратокі з азёр Паўазер’е, Жэнна і Усая, выцякае адзін ручай і р. Дзіва. У лясах заказніка распаўсюджаны хвоя, елка, дуб, бяроза, шэрая і чорная алешыны, у падлеску – вярба, крушына, рабіна, ядловец. У флоры выяўлена 485 відаў сасудзістых раслін, з якіх тайнік яйцападобны, шпажнік чарапіцавы, гарычка крыжападобная, палушнік азёрны, хара грубая занесены ў Чырвоную кнігу Рэспублікі Беларусь. Сярод прадстаўнікоў ахоўнай фаўны тут сустракаюцца вялікі крахаль, звычайны зімародак і вялікі бугай.

Заказнік з’яўляецца папулярным месцам для экалагічнага турызму. Для наведвальнікаў распрацаваны пешыя і веласіпедныя маршруты, абсталяваны месцы для адпачынку. У вызначаныя тэрміны ў возеры дазволена аматарскае рыбалоўства.

Матэрыял падрыхтаваны ў 2023 г.