Заказнік-журавіннік „Борскі“ створаны на тэрыторыі Ганцавіцкага і Лунінецкага раёнаў Брэсцкай вобласці ў мэтах захавання і рацыянальнага выкарыстання каштоўных леса-балотных экалагічных сістэм, месцаў росту журавіны балотнай, а таксама дзікіх жывёл і дзікарослых раслін, якія адносяцца да відаў, уключаных у Чырвоную кнігу Рэспублікі Беларусь (пастанова Савета Міністраў БССР ад 16.08.1979 г. №252). У 2007 г. атрымаў статус рэспубліканскага біялагічнага заказніка.

Агульная плошча тэрыторыі – 2 818,4 га. Заказнік знаходзіцца ў басейне р. Лань і з’яўляецца зонай павышанага ўвільгатнення. Яго дамінуючыя ландшафты – балотныя і леса-балотныя комплексы. Лясы займаюць 82% тэрыторыі і ў асноўным складаюцца з хвоі. Растуць таксама бярозы, дубы, елкі, асіны, кустоўе. У флоры зарэгістравана 457 відаў сасудзістых раслін, з якіх журавіна драбнаплодная і вярба чарнічная ўключаны ў Чырвоную кнігу Рэспублікі Беларусь. Штогод у строга вызначаныя тэрміны ў заказніку дазваляюць збіраць журавіны – ягады вялікай каштоўнасці, крыніцы вітамінаў. Было падлічана, што для захавання і ўзнаўлення неабходна, каб 40–50% іх ураджаю заставалася ў лесе.

Жывёльны свет заказніка налічвае 187 відаў наземных пазваночных жывёл. У яго межах гняздуюцца рэдкія для Беларусі чорны бусел, чорны каршун, чапля-лазянік, вялікі бугай і інш.

Заказнік з’яўляецца аб’ектам экалагічнага турызму. У ім забаронены выпас жывёлы, узворванне зямель, паляванне, правядзенне меліярацыйных работ, выпальванне сухой расліннасці, скідванне неачышчаных сцёкавых вод у навакольнае асяроддзе і інш.

Матэрыял падрыхтаваны ў 2023 г.