Заказнік-журавіннік (з 2007 г. біялагічны заказнік) рэспубліканскага значэння “Чэрнеўскі” быў створаны ў Барысаўскім раёне Мінскай вобласці ў 1979 г. Мэтай заснавання стала зберажэнне ў натуральным стане месцаў росту журавін.

Ахоўная тэрыторыя плошчай 1 тыс. га размешчана на балотах вярховага і пераходнага тыпаў Маленькі Машок, Навасельскі Мох і Крывы Мох. Рэльеф раўнінны, хваліста-ўзгорысты з дзюнамі. У складзе расліннасці пераважаюць хваёва-кусцікава-сфагнавыя фітацэнозы з перавагай журавін. На мінеральных участках пашыраны хваёвыя, яловыя і бярозавыя лясы. У флоры налічваецца 414 відаў сасудзістых раслін. Шмат лекавых – арніка горная, пальчатакарэннік Фукса, званочак персікалісты, зуброўка паўднёвая, сустракаюцца рэдкія для Беларусі баранец звычайны, вярба чарнічная, журавіны дробнаплодныя, чына горная, тайнік яйцападобны. З прадстаўнікоў жывёльнага свету пад аховай знаходзяцца барсук і шэры журавель.

Заказнік з’яўляецца аб’ектам экалагічнага турызму. Для наведвальнікаў па яго тэрыторыі праводзяцца пешыя і веласіпедныя экскурсіі. У вызначаныя тэрміны дазволены збор ягад.

Матэрыял падрыхтаваны ў 2023 г.