Заказнік-журавіннік (з 2007 г. – біялагічны заказнік рэспубліканскага значэння) “Запольскі” быў створаны ў Віцебскім раёне ў 1979 г. Мэтай заснавання стала захаванне ў прыродным стане месцаў росту журавін.

Ахоўная тэрыторыя плошчай 794 га размешчана на вярховым балоце Вялікі Мох. У складзе балотнай расліннасці хваёва-кусцікава-сфагнавыя фітацэнозы. На мінеральных участках пераважаюць яловыя, бярозавыя і асінавыя лясы чарнічнага і кіслічнага тыпаў. Усяго зарэгістраваны 164 віды сасудзістых раслін. У лясах маюцца значныя запасы журавін, сустракаецца ахоўны від расліны – лінея паўночная. На тэрыторыі адзначана гнездаванне занесеных у Чырвоную кнігу Рэспублікі Беларусь рэдкіх відаў птушак: белай курапаткі, варакушкі, шэрага саракуша, шэрага жураўля, вялікага ўліта, балотнай савы і інш.

Заказнік з’яўляецца аб’ектам экалагічнага турызму. У вызначаныя тэрміны ў ім дазволена паляванне і збор ягад.

Матэрыял падрыхтаваны ў 2023 г.