Біялагічны заказнік рэспубліканскага значэння “Медухава” быў створаны ў Зэльвенскім раёне Гродзенскай вобласці ў 1996 г. Мэтай заснавання стала зберажэнне ў прыродным стане ляснога масіву разнастайнай тыпалагічнай структуры з комплексам рэдкіх відаў раслін, жывёл і птушак.

Ахоўная тэрыторыя плошчай 1,3 тыс. га размешчана ў межах Слонімскага ледавіковага ўзвышша, якое з’яўляецца часткай Беларускай грады. Паверхня пакрыта карэннымі высокаўзроставымі дубровамі, ельнікамі і чорнаалешнікамі. Сустракаюцца насаджэнні таполі бальзамічнай і бярозы, асобныя векавыя дрэвы розных гатункаў. У складзе флоры зарэгістраваны 604 віды вышэйшых сасудзістых раслін, з якіх купальнік горны, баранец звычайны, лілея кучаравістая, пальчатакарэннік майскі, тайнік яйцападобны, кадзіла сармацкае, касач сібірскі ўнесены ў Чырвоную кнігу Рэспублікі Беларусь. Прыродны комплекс насяляюць дзікі, казулі, алені, лісы, янотападобныя сабакі, сустракаюцца ахоўныя прадстаўнікі фаўны – барсук, рысь, арэшнікавая соня, сапсан, каршачок, малы падворлік, зялёны дзяцел і інш.

Заказнік з’яўляецца аб’ектам экалагічнага турызму. Для наведвальнікаў праводзяцца экскурсіі, маюцца абсталяваныя месцы для адпачынку. У вызначаныя тэрміны дазволена паляванне, збор ягад і лекавых раслін.

Матэрыял падрыхтаваны ў 2023 г.