Лясны (з 2007 г. – біялагічны) заказнік рэспубліканскага значэння “Прылуцкі” быў створаны ў Мінскім раёне ў 1977 г. Мэтай заснавання стала захаванне ўнікальных лясных насаджэнняў і паляпшэнне ўмоў іх росту.

Плошча ахоўнай тэрыторыі складае 523 га. Тут працякае рака Пціч, непадалёк маецца Воўчкавіцкае вадасховішча. Рэльеф сярэднехвалісты, схілы ўзгоркаў парэзаны ярамі і лагчынамі, паміж якімі размешчаны невялікімі астраўкамі лясы. Лесапасадкі пачаліся яшчэ ў пачатку ХХ ст. У далейшым тут праводзілася інтэнсіўная пасадка лясных парод, атрыманых па абмене з Паўночнай Амерыкі: дугласіі шэрай і шызай, хвоі веймутавай і Мурэя, елкі канадскай, дуба чырвонага, ясеня пенсільванскага, лістоўніцы сібірскай і еўрапейскай, арэха маньчжурскага, аксаміта амурскага, некалькіх відаў таполяў. Найбольшую каштоўнасць мае адзіны ў Беларусі ўчастак дугласіі зялёнай. З мясцовых парод пераважаюць чыстыя і мяшаныя насаджэнні хвоі і елкі звычайнай, дуба летняга, ясеня звычайнага. З рэдкіх раслін на тэрыторыі заказніка сустракаюцца лiлея кучаравістая, аўсяніца высокая і чына гладкая. Фаўна наземных пазваночных налічвае 109 відаў, з якіх арэшнікавая соня і чорны бусел унесены ў Чырвоную кнігу Рэспублікі Беларусь.

Заказнік з’яўляецца аб’ектам экалагічнага турызму, а таксама выкарыстоўваецца Беларускім дзяржаўным тэхналагічным універсітэтам у якасці вучэбнай і вопытнай базы. У вызначаныя тэрміны ў заказніку дазволена паляванне.

Матэрыял падрыхтаваны ў 2023 г.