Біялагічны заказнік рэспубліканскага значэння «Юхнаўскі» быў створаны ў Мінскім раёне ў 2001 г. Мэтай яго заснавання стала зберажэнне ў прыродным стане каштоўных лясных фармацый з рэдкімі відамі раслін і жывёл, занесеных у Чырвоную кнігу Рэспублікі Беларусь.

Агульная плошча заказніка складае 221 га. Рэльеф мясцовасці сярэднеўзгорысты, тэрыторыя пакрыта хваёвымі і бярозавымі лясамі. У флоры налічваецца больш за 300 відаў сасудзістых раслін, з якіх баранец звычайны, пылкагалоўнік даўгалісты, лілея кучаравістая з’яўляюцца ахоўнымі. Жывёльны свет таксама вельмі разнастайны. Тут жывуць казулі, дзікі, янотападобныя сабакі, лісіцы, вавёркі, зайцы, зялёная і шэрая рапухі і інш. Сярод 78 відаў птушак, што насяляюць лес, сокал-кабец з’яўляецца ахоўным.

Заказнік – аб’ект экалагічнага турызму. На тэрыторыі маюцца гасцявыя дамы, пракладзена экалагічная сцежка.

Матэрыял падрыхтаваны ў 2023 г.