Біялагічны заказнік рэспубліканскага значэння “Акцябрскі” быў створаны ў Акцябрскім раёне Гомельскай вобласці ў 2003 г. Мэтай заснавання стала зберажэнне каштоўных лясных фармацый з комплексам рэдкіх відаў раслін і жывёл. Яго частка прызнана ключавой арніталагічнай тэрыторыяй “Пойма Пцічы”.

Ахоўная тэрыторыя плошчай больш за 4 тыс. га ўяўляе сабой леса-балотны комплекс, размешчаны на левым беразе р. Пцічы паміж яе прытокамі, Валожынскім каналам і р. Нератоўкай. Рэльеф пласкахвалісты з пясчанымі дзюнамі. Лясная расліннасць пакрывае 65 %, адкрытыя і нізінныя балоты – 30% тэрыторыі. Найбольш распаўсюджаны ў лесе хвоя і чорная алешына. Можна сустрэць асобныя дубы і елкі ва ўзросце 100–200 гадоў. У складзе флоры налічваецца 507 відаў сасудзістых раслін, з якіх пад аховай знаходзяцца баранец звычайны, фіялка балотная, пылкагалоўнік чырвоны, зубніца клубняносная, чараўнік зеленакветкавы. Жывёльны свет вельмі разнастайны. Тут зарэгістравана 211 відаў пазваночных жывёл. Водзяцца лось, дзік, алень, казуля, бабёр, выдра, цецярук. Сярод ахоўных прадстаўнікоў фаўны – арэшнікавая соня, чорны бусел, шэры журавель, звычайны зімародак, белая сініца, сокал-кабец. Пойма р. Пцічы мае міжнароднае значэнне для захавання некалькіх пар вялікага арляца, які знаходзіцца пад глабальнай пагрозай знікнення.

Заказнік з’яўляецца аб’ектам экалагічнага турызму. Для наведвальнікаў праводзяцца экскурсіі, абсталяваны экалагічныя сцежкі.

Матэрыял падрыхтаваны ў 2023 г.