Біялагічны заказнік рэспубліканскага значэння “Валмянскі” быў створаны ў Смалявіцкім раёне Мінскай вобласці ў 2001 г. Мэтай заснавання стала зберажэнне лясных экасістэм з рэдкімі відамі жывёл і птушак.

Плошча ахоўнай тэрыторыі, размешчанай на Мінскім узвышшы ў верхнім цячэнні р. Волмы, складае 614 га. Рэльеф хвалісты, месцамі плоскі і ўзгорысты. Лесам, пераважна з хвоі, пакрыта 94% яго тэрыторыі. У флоры выяўлена 450 відаў вышэйшых сасудзістых раслін, з якіх у Чырвонай кнізе Рэспублікі Беларусь гарлянка пірамідальная, баранец звычайны, пярэсна еўрапейская, шпажнік чарапіцавы, лілея кучаравістая. Заказнік насяляюць дзік, казуля, ліса, бабёр, заяц, амерыканская норка, гарнастай, лясная куніца. Сустракаюцца рэдкія для Беларусі каршачок, касманогі і вераб’іны сычы, аляпка, ручаёвая стронга.

Заказнік з’яўляецца аб’ектам экалагічнага турызму. Для наведвальнікаў праводзяцца пешыя і веласіпедныя экскурсіі, абсталявана экалагічная сцежка. У вызначаныя тэрміны дазволена рыбалка і паляванне.

Матэрыял падрыхтаваны ў 2023 г.