Біялагічны заказнік рэспубліканскага значэння “Глебкаўка” быў створаны ў Мінскім раёне ў 2001 г. Мэтай заснавання стала зберажэнне ў прыродным стане ўчасткаў лясных фармацый з папуляцыямі рэдкіх жывёл і раслін.

Ахоўная тэрыторыя плошчай 964 га размешчана ў лесапаркавай частцы зялёнай зоны Мінска. Тут пачынае свой шлях невялікая рэчка Глебкаўка. У покрыве – лясы, пераважна хваёвыя, месцамі лугі і хмызнякі. У флоры 496 відаў сасудзістых раслін, сярод якіх сустракаюцца занесеныя ў Чырвоную кнігу Рэспублікі Беларусь купальнік горны, пярэсна еўрапейская, лілея кучаравістая, ятрышнік абпалены, гарлянка пірамідальная, пылкагалоўнік даўгалісты і інш. Лес насяляюць казуля, куніца, ліса, вавёрка, гарнастай, заяц, шэрая няясыць, цецярук, асаед, рабчык. Зімой заходзяць лось, дзік, янотапдобны сабака. З ахоўных відаў трапляецца пустальга звычайная.

Заказнік з’яўляецца аб’ектам экалагічнага турызму. Для наведвальнікаў праводзяцца пешыя і веласіпедныя экскурсіі, абсталявана экалагічная сцежка. У вызначаныя тэрміны дазволена паляванне.

Матэрыял падрыхтаваны ў 2023 г.