Біялагічны заказнік рэспубліканскага значэння “Замкавы лес” быў створаны ў Ваўкавыскім раёне Гродзенскай вобласці ў 1998 г. Мэтай заснавання стала зберажэнне прыродных комплексаў з участкамі высокаўзроставых лясоў, рэдкіх па фларыстычным складзе.

Плошча ахоўнай тэрыторыі, размешчанай на Ваўкавыскім узвышшы, складае 3,6 тыс. га. Рэльеф градава-ўзгорысты. Большая частка прыроднага комплексу пакрыта лесам з хвоі, елкі, граба, клёна і бярозы Асаблівую каштоўнасць ім надае значная колькасць дубраў (больш за 30% насаджэнняў). У флоры выяўлена больш за 600 відаў вышэйшых сасудзістых раслін, з якіх баранец звычайны, кураслеп лясны, купальнік горны, пылкагалоўнік чырвоны, кадзіла сармацкае і лопух дуброўны ўнесены ў Чырвоную кнігу Рэспублікі Беларусь. Сярод рэдкіх прадстаўнікоў фаўны ў заказніку сустракаюцца барсук, рысь, чорны бусел, звычайная пустальга, каршачок, жужалі рашэцісты і фіялетавы, махаон, чмель мохавы, пераліўніца вялікая і інш.

Заказнік з’яўляецца аб’ектам экалагічнага турызму. Для наведвальнікаў пракладзены пешыя і веласіпедныя маршруты. Мясцовай славутасцю стаў 400-гадовы цар-дуб.

Матэрыял падрыхтаваны ў 2023 г.