Ландшафтны заказнік рэспубліканскага значэння “Траскоўшчына” быў створаны ў Мінскім раёне ў 2001 г. Мэтай заснавання стала зберажэнне ў прыродным стане маляўнічага ляснога масіву ўздоўж р. Іслачы у межах Мінскага ўзвышша з рэдкімі відамі жывёл і раслін.

Плошча ахоўнай тэрыторыі складае 745 га. Рэльеф буйнаўзгорыста-градавы з камавымі пагоркамі і глыбокімі рачнымі далінамі. Тут шмат лясных крыніц і ручаёў. Лясны масіў пераважна з ельнікаў і бярэзнікаў займае палову прыроднага комплексу. У складзе флоры 475 відаў сасудзістых раслін. Шырока распаўсюджаны лекавыя, харчовыя і дэкаратыўныя – валяр’ян лекавы, падтыннік, парэчка, маліна, ажына, каліна і інш. У Чырвоную кнігу Рэспублікі Беларусь занесены баранец звычайны, званочак шыракалісты, грыб вясёлка звычайная.

Заказнік з’яўляецца папулярным месцам экалагічнага турызму. Для наведвальнікаў тут праводзяцца пешыя і веласіпедныя экскурсіі, абсталявана экалагічная сцежка. У вызначаны час дазваляецца рыбалка.

Матэрыял падрыхтаваны ў 2023 г.