Біялагічны заказнік рэспубліканскага значэння “Тырвовічы” быў створаны ў Пінскім раёне Брэсцкай вобласці ў 1994 г. Мэтай заснавання стала зберажэнне і ўзнаўленне ўнікальнага прыроднага комплексу з рэдкімі відамі раслін і жывёл.

Ахоўная тэрыторыя плошчай 1,4 тыс. га размешчана на стыку Столінскай водна-ледавіковай раўніны з нізіннай далінай р. Стыры. Паверхня раўнінная, на значнай плошчы забалочана, у цэнтральнай і паўночнай частках пакрыта шматлікімі дзюнамі. У покрыве лясы з граба, дуба, клёна і хвоі. Шмат лекавых, вострапахучых і дэкаратыўных раслін (ландыш майскі, званочак персікалісты, цмен пясчаны, пятрушка горная, цыкорыя звычайная, вятроўнік вязалісты). Сярод ахоўных відаў выяўлены венерын чаравічак сапраўдны, зубніца клубняносная, тайнік яйцападобны, пылкагалоўнік даўгалісты, пальчатакарэннік майскі, шпажнiк чарапiцавы, баранец звычайны. Жывёльны свет заказніка прадстаўлены ласём, дзіком, казуляй, зайцам, янотападобным сабакам, воўкам. Шмат рэптылій і птушак. Трапляюцца віды, унесеныя ў Чырвоную кнігу Рэспублікі Беларусь – барсук, арэшнікавая соня, чорны бусел, звычайная пустальга, вялікі бугай, філін, беласпінны дзяцел, балотная чарапаха і інш.

У вызначаныя тэрміны ў заказніку дазволена паляванне.

Матэрыял падрыхтаваны ў 2023 г.